Les Naves d’El Natahoyo acueye’l domingu 23 d’ochobre esti ciclu de conciertos en formatu íntimu, grabaos y emitíos per Internet
Esti domingu 23 a les 12h remata la edición 2022 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique. Nesta grabación participen el grupu jazz Slum Suit pa presentar el so discu ‘La Casa Vieya’ y el dúu de rap Mostru l’Horru , que publicaron apocayá’l so primer trabayu ‘Señales de Fumu’.
Slum Suit ye una banda de jazz de raigañu que trabaya cola música popular asturiana amestándola a armoníes jazz. Formólu en 2017 el gaiteru y saxofonista carbayón Carlos Casado, cuando taba emigráu a Nueva York, y en 2019 afitó’l proyectu n’Asturies. ‘La Casa Vieya’ ye’l so tercer EP, nel qu’anoven el so soníu y incorporen al grupu a veteranos de la escena jazzística astur.
Mostru l’Horru ye una formación de hip hop n’asturianu fundáu en 2021 pol xixonés Fran Méndez y nel que participa’l productor llangreanu Zeros. ‘Señales de Fumu’ ye’l so primer trabayu, un discu rap d’ocho cantares nel que tamién suenen influyencies d’otros estilos como’l reggae o’l rock.
Cola participación d’estos dos proyectos musicales nuevos -que reflexen la diversidá de la música fecha n’asturianu-, Amosando zarra la so cuarta temporada. La entrada pal eventu ye de baldre, pero namás tienen invitación les persones asociaes a L’Ensame de musicasturiana.com que ganaron el sortéu d’entraes.
Cuatro años y 20 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 20 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel y Algaire. La suma de los videos de los conciertos algama más de 200.000 reproducciones en YouTube.
Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez, patrocinada nesta edición por Fundación Caja Rural de Asturias, cola collaboración de Fuensanta y subvencionada pola Fundación Municipal de Cultura y Educación de Xixón.
Redaición InfoAsturies
This work is licensed under a Creative Commons Attribution 4.0 International License.
