Trátase del proyectu d’un nuevu parque eólicu con 8 molinos d’una potencia de 6 Mw ca un, que pretende istalase ente los conceyos de Pravia, Cuideiru y Salas y que ta’n tramite de consultes fasta esti xueves
Esti parque nun cumple la normativa de distancies a nucleos habitaos, en cuantes que va tar a menos de 1000 metros de dellos núcleos de población. En concreto taría a 773 metros d’Ablanéu, 689 metros de Sangreña, 685 metros de Valdiviello y 799 metros de Carceda
Tal como aleguen dende la Coordinadora Ecoloxista, esta distancia mínima d’un kilómetru ta recoyíaa na Directriz 13ª “Compatibilidá d’usos” del Decretu 42/2008, de 15 de mayu, pol que s’aprueben definitivamente les Directrices Sectoriales d’Ordenación del Territoriu pal aprovechamientu de la enerxía eólica, especialmente que: los aerogeneradores guarden una distancia mínima de 200 metros a edificaciones d’usu puramente agrícola o ganaderu y Montes naturales, considerándose comu tales les mases arbolaes d’especies autóctones que tengan una fracción de cabida cubierta cimera al 50% (que pidimos ampliar a tou tipu de mases arbóreas d’alcuerdu a les directrices de EUROBATS pa parques eólicos); 500 metros a Entidaes de población non delimitaes como Núcleu Rural nel planiamientu urbanísticu vixente y edificaciones con usu distintu del puramente agrícola o ganaderu; y 1000 metros a entidaes de población delimitaes como Núcleu Rural y suelos clasificaos como Urbanu o Urbanizable, según el planiamientu urbanísticu vixente.
El proyectu tien una importante visibilidá al tar asitiáu na Sierra de Pumar y Sierra de Villarín ente les cotes de 500 y 700 metros aprosimao sobro’l nivel del mar, ente’l Picu d’Andolines y picu Candanéu. Los molinos van tener una torre de 135 metros y un rotor de 170 metros, polo qu’el so altor va superar los 220 metros reales d’altor..
Hai que recordar que’l desendolcu de los parques eólicos n’Asturies tuvo llaráu d’irregularidaes, dalgunes ensin resolver, como la de que tou esti conxuntu de parques tendría de sometese a una Evaluación Ambiental Estratéxica (EAE) d’alcuerdu a la Directiva 2001/41/CE y d’alcuerdu a la Llei 9/2006, de 28 d’abril, sobro evaluación de los efectos de determinaos planes y programes nel mediu ambiente. Lo que ta faciendo’l Principáu ye dexar que se tramiten decenes de parques por separáu a pesar de que resulta evidente que se trata de los mesmos parques, una y bones dalgunos van pegaos a otros y comparten instalaciones.
Redaición InfoAsturies
This work is licensed under a Creative Commons Attribution 4.0 International License.
