“Ye una pena ver como un proyectu que nació, non pa ser cogobernante muleta del PSOE, sinón pa impugnar toa una cadarma política, convirtióse nuna axencia de colocación”

Del facebook de Rafael Velasco Rodríguez

Podemos n’Asturies encara unes primaries caracterizaes, al mio xuiciu, por un doble suicidiu políticu.Per un llau, sigue yá’l so incansable enfotu d’esmagayar cuadros,  de los cargos publicos de los últimos años nun queda casi naide. Per otru llau, pedimiando un llugar na mesa del PSOE, utilizando como trampolín una apuesta por ver quién llogra la bendición de Yolanda Diaz nesi camín.

Llueñe queda la disputa pola hexemonía social, por ganar a la casta y por superar el réxime del 78, agora  aspira namás a ser una pieza más social d’esi réxime. Esa estratexa que comparten sustancialmente toles capiyes en conflictu ye un camín a denyuri, másime cuando la to división interna te fai ser una parte prescindible nesi tipu de procesos, y el que meyor sabe d’ello ye Adrián Barbon, pero tamién Yolanda Diaz.

Llueñe queda la voluntá de construyir xunidá popular, non solo pa faer otres polítiques, sinón pa faela d’otra manera.

Nesta coxuntura, amás, siguimos siendo presos d’un gobiernu estatal que claramente apuesta pola mayor implicación na OTAN y la so guerra con Rusia, ensin que los y los ministros/es de Xuníes Podemos seyan quien a dicir un Non creyíble.

Poro, nestes primaries nun tengo dengún aliciente pa votar a naide, anque nes distintes capiyes pueda haber xente qu’individualmente lo mereza y solo votaría a Rubén Darío Norniella González , por pura complicidá memorialista y republicana. Ye una pena ver como un proyectu que nació, non pa ser cogobernante muleta del PSOE, sinón pa impugnar toa una cadarma política, convirtióse nuna axencia de colocación, onde les primaries son un meru concursu de méritos pa consiguir o caltener emplegu.

Asina que vos vaiga guapo, pero non nel mio nome.

RAFAEL VELASCO. Ochobre, 2022.

This work is licensed under a Creative Commons Attribution 4.0 International License.