Una vegada más el Pueblu Asturianu amuesa la so refuga a la monarquía española y a los premios colos que, a costa de los asturianos, quieren llavar la cara a una istitución corrupta dende’l so ñacimientu

La monarquía española da les boquiaes y aprofita cualisquier oportunidá pa facer esibición d’españolismu colonialista con desfiles medievales y ritos de vasallaxe. El gobiernu asturianu, tan socialistes ellos, tan d’izquierdes, baxen la testuz, entregaos y sumisos, ante la familia real y non solo ponen les perres, sinón lo que faiga falta, a dimposición de los monarques. Los responsables direutos del malvivir diariu desfilen pela alfombra collorada. La princesina humilda a la mocedá asturiana atraviéndose a falar de dificultaes dende’l so tronu too pago y la corte de bufones sal por faralaes y fandangos en bochornosu asonsañu del más ranciu españolismu.

Entantu, a unos pasos y bien frenaos polos perros guardianes del statu quo, el pueblu asturianu manifiéstase.

Asturies nun tien rei, dicen. Fartones, fuera d’Asturies, los Borbones a los tiburones, República Asturiana glayen, ximielgando asturines.

Son los trabayaores, los paraos y los despidios, los sindicalistes, los estudiantes, los ganaeros, los pensionistes, los homes y muyeres d’Asturies que nun asumen xugos, y muncho menos xugos foriatos. Son el Pueblu Asturianu que glaya, que desixe, que costruye coles sos voces otru futuru, el de so.

República asturiana versus monarquía española. Tiempu al tiempu.

Llucía F. Marqués

This work is licensed under a Creative Commons Attribution 4.0 International License.