Entamada pola Fundación Asturies XXI, col sofitu de la Conseyería de Cultura, política llingüística y turismu, y de la FMCEUP de la Casa Conceyu de Xixón, tien como oxetu la recuperanza, contestualización, dixitalización y centralización de semeyes d’enantes de 1980 rellacionaes cola sidre

LA SIDRA.- Les semeyes costitúin un material etnográficu y hestóricu de primer orde, que non siempres se valora como ye mester, y qu’en munches ocasiones dáñase o piérdese al cabu los años.

Nel casu la sidre, la bayura semeyes na qu’apaez la sidre como protagonista o como acompañante son munches y perinteresantes, pero fasta agora atópense disperses, y les más de les ocasiones ensin analizar nin contestualizar.

Ello asina, el proyeutu de Fototeca LA SIDRA, entamáu pola Fundación Asturies XXI márcase como oxetivu la recuperanza y dixitalización d’esta triba semeyes -lo que garantiza la so perdurabilidá al traviés del tiempu- la centralización de los recursos nun espaciu d’acesu públicu (el propiu Muséu del Pueblu d’Asturies, y la web www.lasidra.as/Fototeca), la contestualización hestórica, social, etnográfica…, l’analís de los conteníos, y lo que ye tamién perimportante, el so espardimientu y la so puesta en valor.

Pa ello, cunta col sofitu de Conseyería de Cultura, política llingüística y turismu y de la Fundación Municipal de Cultura, Educación y Universidá Popular -FMCEUP- de la Casa Conceyu Xixón, y la collaboración d’asociaciones fotográfiques como ‘Asemeyando’, y la d’un curiosu grupu collaboraores, que pasu ente pasu tan dándo-y forma y conteníos a esta iniciativa.

Pa esta Fototeca LA SIDRA, ofrécense dos posibilidaes d’aporte de material:

• 1.- La donación de semeyes, que pasen a integrar el fondu museísticu col que cunta la Fundación Asturies XXI nel Muséu del Pueblu d’Asturies, dixitalizándose, y entregándose al donante una reprodución física d’alta calidá y mayor formatu que l’orixinal, apurriéndose-y tamién l’archivu dixital.
• 2.- Facilitando la dixitalización de les semeyes, pero conservando la so propiedá física, en cuyu casu recibe tamién l’archivu dixital.

Trátase d’un proyeutu tan interesante como ambiciosu, polo que dicha Fundación fai un llamamientu a la collaboración, tantu no que cinca a organizativamente nel propiu proyeutu como al aporte de material, facilitando pa ello un corréu lletrónicu de contautu: fasturies21@gmail.com

Alberto Rodríguez

This work is licensed under a Creative Commons Attribution 4.0 International License.