Nuna mesma selmana la miel ya’l quesu asturianos recibieron el reconocimientu internacional pola so calidá y va menos d’un mes venti sidres asturianes destacaron nel Salón Internacional de les Sidres de Gala

Asturies destaca pola alta calidá de los sos productos agroalimentarios, pero nes tiendes y nos chigres d’Asturies entá seguimos viendo comu se resalten productos foriatos. Asina, ye más fácil ver nes cartes de los establecimientos asturianos vaca gallega o txoguitxu que xata roxa o gochu asturcelta, vinos de la Rioja anantes que vinos de Cangas, embutidos ibéricos anantes que choscu de Tineo, quesu manchegu anantes qu’asturianu, champagne o cava anantes que sidre brut.

Sacasí, cuando los productos asturianos compiten a nivel internacional sí que son valoraos. Ensin dir más lloñe esta selmana son dos los concursos internacionales nos que Asturies rescampló: los quesos asturianos ganaron na menos que siete medayes nel Mundial de Quesos cellebráu en Gales, compitiendo con otres 4.300 variedaes y la miel d’uz d’Outurelos (Ibias) foi reconocía comu la meyor miel del Estáu.  Quiciás esta falta d’apreciu polo propio ello vaiga asociao a la falta d’autoestima nacional que carauteriza a un país que foi ensiñáu a dispreciar la so fala, la so cultura, la so hestoria, el so ser. Asturies tien de deprender a querese y tenemos que facelo dende dientro, defendiendo siempre lo propio.

Entamar ye fácil. Consumi asturiano.

Alberto Rodríguez

This work is licensed under a Creative Commons Attribution 4.0 International License.