La formación d’un nuevu partíu de corte soberanista coincide cola victoria de la estaya más inconformista de Podemos nes recién primaries
Les primaries vienen de dar la victoria a Covadonga Tomé, qu’va encabezar la candidatura de Podemos n’Asturies nes prósimes elleiciones autónomiques con 1.565 votos frente a 1.150 a l’actual secretaria d’organización del partíu, Alba González.
Tomé forma parte del sector críticu de Podemos en Asturies, neto que’lanterior secretariu xeneral, Daniel Ripa, enfrentáu a la dirección qu’encabeza la diputada española Sofía Castañón.
Per otra parte, esta fin de selmana alredor de 70 persones axuntáronse nel Teatru El Llar de Corvera pal Congresu Fundacional d’Aína, una organización nueva que se define como soberanista d’esquierda y que se declara “abiertos a dialogar y llegar a alcuerdos con otres fuercies y sectores de la esquierda alternativa d’esti país”.
Nesi sen, Andecha Ástur llantó yá la primer semienta de collaboración, unviándo-yos un saludu nel so Congresu Fundacional y cellebrando la incorporación de voluntaes y sensibilidaes nel espaciu políticu de la esquierda asturiana, “un pasu alantre -declaren- na organización de la sociedá asturiana alrodiu de principios d’esquierda asturiana soberanista y l’encadarmar un frente común ampliu, que dexen ufrir a la sociedá asturiana un proyeutu vidable en defensa de los sos llexítimos drechos presonales y colleutivos“.
Alberto Rodríguez
*Semeya garrada del twitter d’Aina
This work is licensed under a Creative Commons Attribution 4.0 International License.
