Nos venti años de percorríu d’esta banda, qu’anguañu ta dirixía por Velo Muñíz y David González (Guas), actuó per dellos países: Asturies, España, Francia y Portugal 

La Banda Gaites de Castrillón cellebra’l so XX Aniversariu con una Selmana Cultural apiná de charres, talleres y actividaes, que finará con un gran conciertu de la Banda’l sábadu 26 nel Teatru Valey de Piedres Blanques, que sedrá tamién l’escenariu del restu d’actividaes.

Les actividaes entamarán el 18 payares cola apertura de la esposición dedicá a estos venti años d’andadura de la Banda Gaites nel Foyer del Teatru.

El díe 21 Daniel García de la Cuesta protagonizará un conciertu participativu con istrumentos tradicionales na Sala Polivalente. Sedrá de magar les 19:30. Nel mesmu llugar a la mesma hora, al díe viniente, Fe Santoveña dará una charra sobro’l traxe’l país ya’l 23 Stéphane Riou y Patrice Flamme entamarán un taller de música y balles tradicionales de Bretaña. La música y balle tradicionales asturianos tendrán el so momentu el 24 de payares a les ochu la tarde, de la man del Grupu Tradicionando. El 25 podrá esfrutase nel Teatru Valey d’un conciertu del grupu de folk Felpeyu.

Comu remate de les actividaes programaes, la Banda Gaites cellebrará un conciertu cola participación de dellos amigos y collaboraores d’otres formaciones folclóriques.

Metanes el Conciertu fadráse entrega de la Gaita d’Oru a persones implicaes na recuperación, promoción ya investigación de la cultura asturiana al través de la música y la Flor del Agua a persones que destaquen pola so collaboración cola Asociación.

Alberto Rodríguez

This work is licensed under a Creative Commons Attribution 4.0 International License.