El XII Seminariu d’Estudios Asturianos de la Fundación Belenos va cellebrase los díes 19 y 20 de payares, na Puela d’Allande, cola tema “Na llende de lo escuro: les mazcaraes d’iviernu n’Asturies”
El sábadu 18 ta acutáu pa la presentación de ponencies, coles intervenciones, n’horariu de mañá, del etnógrafu Oscar J. González, autor del llibru “Las Mascaradas de la Península Ibérica” que falará de les mazcaraes tradicionales n’Europa; darréu, Ramsés Ilesies y Xose Antón Fernández Ambás, responsables del Archivu de la Tradición Oral d’Ambás (ATOAM) presentarán “L’ATOAM na recuperación de los aguilandeiros de San Xuan de Villapañada, Grau, ya una chalga nel mundu de la mázcara tradicional asturiana.
Tres d’una curtia posa, Cristina Cantero, etnohestoriadora y esperta n’interpretación del padremoñu, protagonizará la charra “Los Sidros, una tradición en cambiu permanente”.
Depués de la xinta dedicaráse un tiempu a “Les mazcaraes y los aguilandos en Tinéu”, de la man de Rosa F. Delgado y Elías Veiga, etnógrafos y miembros de los Guilandeiros de Tinéu. Darréu Naciu’l Riguilón, etnógrafu autor del llibru “L’aguinaldu nel Surocidente d’Asturies”, que presentará’l tema “L’aguilandu en Xedré (Cangas). Anxel Nava, artista visual y axitador cultural, falará de “Una mazcarada urbana recuperada apocayá, los mazcaritos d’Uviéu”.
La cabera intervención del díe correrá a cargu d’Ana Díaz, Graduá en Turismu y fundaora de Green Doors Asturies, que tratará’l tema “Una mazcarada llocal, Os Reises d’El Valledor”.
Tres de la cena cellebraráse un Filandón, folixa nuecherniega con musica’l país.
La segunda xornada entamará a les 11:30 con un conceyu abiertu so los “Personaxes de les mazcaraes: pequeña amuesa de les mazcaraes d’Allande, Tinéu y Uviéu”, que rematará con un pasucais per La Puela y xinta de dispidía
Alberto Rodríguez
This work is licensed under a Creative Commons Attribution 4.0 International License.
