Asturies ye’l territoriu del estáu con mayor proporción de mayores de 65 años, un 27,04%, 7 puntos perriba la media estatal
El 2022 recueye la cifra hestórica más alta de fallecimientos, ensin finar l’añu la cifra algama los 11.373. Entantu, son poques les muyeres que s’animen a tener fios, 3.661 partos nel mesmu periodu, ello ye, un saldu vexetativu de menos 9.029 asturianos, ello ye, una media de 25 asturianos menos al díe.
L’alta tasa de mortalidá desplícase aina pola prevalencia de persones de muncha edá. Asina, 86.296 asturianos tienen más d’ochenta años, siendo’l mayor grupu de población, a bona distancia de los 28.602 menores de cuatro. Amás, seyes de ca diez muyeres ya dexaron atrás la so edá fértil. Son datos que nun allumen un futuru mui esperanzaor no que cinca a una recuperación futura. La progresión de la cayía ye llento, pero costante y xorreciente, añu tres añu el saldu vexetativu apiora nun círculu viciosu que nun va francer por si solu.
El saldu migratoriu, de +2.890 persones al añu tomando comu referencia’l caberu llustru, nun ye abondo pa compensar la perda d’asturianos, pero ye que tampoco ye la solución, polo menos no que cinca a identidá, a nun ser que se ponga en marcha un programa seriu d’integración d’inmigrantes que-yos enseñe los vezos, llingua, hestoria y tradiciones asturianes de manera que se caltenga vivo tolo qu’implica ser asturianos: los fechos espeyen que son especialmente receutivos a ello y nagüen por formar parte de la nuesa cultura, pero falten los sofitos istitucionales que-yos lo faciliten.
Llucía F.M
This work is licensed under a Creative Commons Attribution 4.0 International License.
