Mariano Suárez Rodríguez [*]

Esti 1 d’avientu cellébrense les elleiciones sindicales nel enseñu públicu non universitariu d’Asturies. Yo voi dar el mio votu, por primer vegá, a les compañeres y compañeros que formen la llista de la Corriente Sindical d’Izquierda.

Llevo 38 años comu mayestru na enseñancia pública asturiana, dalgunos d’ellos con militancia activa n’otru sindicatu, los caberos ensin atopar una organización pola que me sintiere representáu. Sicasí, agora, cuandu me falta poco más d’un mes pa xubilame, tengo la suerte de coincidir col proyeutu sindical que representa la Seición Sindical d’Enseñancia de la CSI.

De CSI-Educación valoro, especialmente, que representa un modelu sindical alternativu, de clas, asturianu, asambleariu, autorganizáu y llaicu, que refuga’l modelu sindical sofitáu nes lliberaciones y que creye na llucha a pie de cai.

Vivimos tiempos llamentables nos que les grandes centrales sindicales representen intereses ayenos a Asturies y a los sos trabayaores, siendo maquinaries de xestión d’intereses inconfesables, de redes clientelares, de fondos públicos y sovenciones. Énte esta rialidá les compañeres y compañeros de CSI-Educación tienen un proyeutu claru, viable y éticu pa la Escuela Pública Asturiana y puxu pa defendelu énte les istituciones y na cai.

CSI-Educación entiende, comu yo, qu’Asturies ye’l marcu específicu de les rellaciones llaborales que caltenemos comu trabayaores.

CSI-Educación entiende, comu yo, que la Escuela Pública Asturiana costrúise partiendo de la llingua, la cultura y la memoria hestórico propies del Pueblu Asturianu.

CSI-Educación entiende, comu yo, que les y los enseñantes somos parte de la clas trabayaora.

CSI-Educación entiende, comu yo, que dengún gobiernu pue ufrir un sirviciu educativu públicu de calidá ensin reconocer y respetar los drechos llaborales de los sos trabayaores.

CSI-Educación entiende, comu yo, que l’asamblea ye la ferramienta básica de l’aición sindical y la cai el marcu propiu pa la defensa los drechos llaborales.

Por toes estes razones, les compañeres y compañeros qu’integren la llista de CSI-Educación cuntarán col mio votu. Va ser el caberu que podré emitir comu mayestru n’activu, y voi dalu cola esperiencia d’un vieyu mayestru escuela, cola dinidá d’un trabayaor y col arguyu d’un asturianu.

[*]Mayestru escuela demientres los caberos 38 años. Hai tiempu foi miembru del Secretariáu d’Asturies del SUATEA, miembru del Secretariáu Confederal de los Sindicatos de Trabayaores de la Enseñancia y miembru del Conseyu Asesor d’Educación pal enseñu non universitariu d’Asturies. Entamó y cordinó los primeros años de la Secretaría de Llingua y Cultura del SUATEA. Entamó la escolarización del asturianu comu mayestru de los Centros Pilotos pa la escolarización de la Llingua Asturiana. Escribió delles obres de lliteratura infantil y cordinó la edición de dalgunes colleiciones lliteraries y didáutiques pal enseñu. Premiu a la Innovación Educativa na XIV Edición de los Premios Eleuterio Quintanilla, del Conceyu Xixón.

This work is licensed under a Creative Commons Attribution 4.0 International License.