El personal de llimpieza del HUCA denuncia ante la Xunta Xeneral los retayos na calidá del serviciu y los abusos llaborales
Trabayaores de llimpieza del HUCA convocaron ayeri la so segunda concentración esti mes pa visibilizar el conflictu que tienen cola empresa axudicataria del serviciu, Lacera, que pretende agora retayar la plantiya, faciendo imposible la prestación d’un serviciu de llimpieza en condiciones.
Los incumplimientos de los drechos llaborales y de los alcuerdos pautaos lleven años enfrentando al grupu Lacera, empresa que l’HUCA socontrata pa la llimpieza, colos sos trabayaores. El reciente anunciu del retayu de 19 puestos de trabayu foi lo que finó nesta ocasión cola pacencia de los emplegaos y emplegaes, non solo pola xente que perderá’l so puestu, sinón por que esti bultable retayu de plantiya va multiplicar la carga de trabayu sobre’l restu, apiorando, alvierten, el serviciu. Falamos de llimpieza y del Hospital más emportante d’Asturies, nun ye broma, comu remembraben ayeri nes sos pancartes “ensin llimpieza nun hai salú” y la llimpieza nel HUCA va reducise a mínimos, especialmente nos fines de selmana, onde la plantiya n’activu sedrá escasísimo, lo que “va influyir direutamente na salú del usuariu”. 
Dende’l comité de empresa denuncien criterios puramente económicos pa decidir esti retayu y qu’ello nun ye l’únicu conflictu, ya que se suma a reiteraos “incumplimientos” de les condiciones del contratu por parte d’una empresa que cientra la so política llaboral en masimizar beneficios.
Non solo reclamen a Lacera, sinón comu responsables sosidiarios a la xerencia l’hospital y a la Conseyería, desixendo que tomen cartes nel asuntu pa garantizar el cumplimientu del contratu y poner frenu a esta situación.
Alberto Rodríguez
This work is licensed under a Creative Commons Attribution 4.0 International License.
