Tres años de solombra, el Hip Hop Asturianu ta porfín tomando un papel protagonista na sociedá y na vida de munchos xovenes. Una de les espresiones más conocíes d’esta cultura son les batalles de rap, que crecieron esponencialmente n’Asturies nos últimos años. Poro güei falemos con Caña, raperu y organizador de les Royale Battles, una de les organizaciones más importantes nesti ámbitu a nivel llocal

Les batalles de rap n’Asturies, pa munchos son daqué desconocio. Entá se conoz menos les que se faen nes nueses ciudaes y parques.

Fálanos un pocu d’eso, ¿qué son les batalles?

Yo resumiría les batalles como un discursu argumental nel qu’improvises al momentu y rapees o flúis una base. Hai munchos matices yá que non siempres ye sobre una base de rap o non siempres que ganes argumentalmente vas ganar la batalla, pero ye una entemez de dambes lo que puede faer decantar a los xueces sobro quien s’impunxo.

Afondando n’Asturies, quien son les persones más relevantes de la escena?, ¿y los raperos más importantes?

El freestyle asturianu entamó va munchos años pero nun tenía tantes miraes enriba, podríamos falar de la vieya escuela y mentar a Botta, un referente ensin llugar a dulda. Tamién ye importante destacar el papel que tuvo Gazir nel freestyle asturianu y como fixo que se viralice entá más la movida de la zona.

Falando de l’actualidá del parque, podríamos estremalo en dos partes, los freestylers más consagraos que tienen muncha esperiencia a los sos llombos y tuvieron bones actuaciones fora d’Asturies como son el casu de Flick, Pelayo, Qmc y n’especial JDR. Y per otru llau la nueva fornada de freestylers con muncho potencial y dispuestos a siguir los pasos de los enantes mentaos como son el casu de Jorge Mauro, Iyangl, Adriana o Isma. Hai munchos más ensin dulda pero son los primeros nomes que me vienen a la cabeza.

Onde se realicen les batalles n’Asturies?

Anguañu hai munches organizaciones de freestyle polo que los llugares nos que se realicen eventos son ca vez más. Creo que ye llóxico que la mayor parte de los eventos se faigan nes zones más céntriques pa tolos freestylers como pue ser el casu d’Uviéu y Xixón. Pero n’Asturies siempres qu’hubo un eventu n’Avilés, na Felguera, la Pola Siero… xuntémonos y fuimos ensin problema a ayudar y a participar.

¿Royale Battles, porque naz, cual ye l’orixe? ¿Y l’oxetivu?

La nuesa organización naz tres una pequena charra con Costa, (otru de los miembros de Royale Battles) na que-y comentaba la falta de visibilidá de los eventos asturianos. Yo vía como se faíen bonos eventos, esfrutaba munches de les batalles en persona pero depués nun se xubíen a YouTube y polo tantu esi talentu perdíase por completu. L’oxetivu que teníemos dende un principiu yera visibilizar la escena asturiana ya intentar ponela nel mapa y que xente de tol mundu pueda esfrutar les batalles que se faen equí.

Formasteis parte d’eventos importantes a nivel nacional, fálanos d’ellos

Si, tamos bien arguyosos de conseguir tantu en tan poco y gracies a Freestyle Rankings, consiguimos realizar eventos de talla estatal, como pueden ser MiraElBuenRap, StreetDogs, FreeFighters, Gold Battle…

A títulu personal, ¿de cuál d’ellos tas más arguyosu?

El mayor eventu que realicemos, foi ensin dulda la Rexonal de Freedom Fighters. Cuntó con al sofitu de delles marques incluyíes RedBull. Consiguimos xuntar a 32 freestylers de munches partes del estáu, pasando poles Isla Baleares, Madrid, País Vascu, Galicia… Tamos bien arguyosos d’esi eventu y de como salió tou finalmente.

Amás de les feches regulares de royale Battles, ¿prósimos eventos?

Un de los proyectos que vamos realizar esti Payares ye la Copa Principáu d’Asturies, un eventu que llevó muncho trabayu per detrás y que cunta con puntos pal Ascensu a FMS España. Dempués d’esti eventu vamos faer un pequenu parón nel que vamos siguir trabayando pa faer el calendariu de 2023, nun podemos adelantrar nada pero vienen eventos bastante fuertes pal añu que vien.

D’últimes ¿Que conseyu-y daríes a daquién qu’entame?

El meyor conseyu que puedo dar a daquién qu’empieza ye qu’apurra daqué distinto a lo que se ta faciendo na so zona, d’esa manera va faese un espaciu pente les organizaciones del so panorama, y falando más en concretu d’Asturies, creo que xeneremos una bona comunidá ente les organizaciones y considero que cuantes más haiga, meyor, yá que se van facer más eventos, más competitividá sana  y mayor ambición vas xenerar al restu, p’ameyorar ya impulsar lo propio y al empar, lo común.

Nel Dos Santos

This work is licensed under a Creative Commons Attribution 4.0 International License.