Pel añu 2001 salió una campaña institucional del Gobiernu del Sr Areces con unos carteles onde salíen retrataos mozos y moces trabayando con una frase que dicía “Queremos que trabajes aquí, en Asturias”. Faltó tiempu pa qu’un partíu estraparllamentariu arrepostiara al Señor Areces y la compañía y-y mangaren a aquellos carteles, una banda tresversal que ponía “MENTIROSOS”. Toi falando d’Andecha Astur, y d’una de les meyores campañes d’esta organización que foi la primera, y amás un poco visionaria, de tratar esti problema del despoblamientu y de la emigración de la mocedá asturiano, un problema que’l mesmu señor Areces calificó un par d’años más tarde como “leyenda urbana”.
El casu ye qu’estos cuatro “aventaos y raros”, ente los que m’incluyó porque milité nesta organización, teníen tola razón y ventiun años más arriba, vemos como Asturies ta desangrándose demográficamente, y non solo por un miedre vexetativu negativu, sinón tamién por una cuerda de mocedá bien preparao y formao nes escueles, institutos y universidá d’Asturies (ye Universidá d’Uviéu, yá lo sé) que nun atopa modo equí y nun-y queda otra que colar.
Asturies esporta mocedá bien formao, mui bien formao, qu’a la hora rematar la etapa académica atópase cola muria del “¿Y agora, qué?”.
Como bien diz esti rapaz na entrevista, cola entrada d’España na UE hebo reconversión a tolos niveles y pa compensalo hebo cuartos qu’aportaron d’Europa y que nun supieron aprovechase pola falta de mires de los nuestros responsables políticos y sindicales y cuando non, por delles práctiques poco llegales, por nun-yos llamar corruptes (Nel 2000 sentí a un ex compañeru de trabayu too arguyosu dicir que firmó por dar un cursu pantasma por 100.000 pesetes), siendo un exemplu claru la xestión de los Fondos Mineros nos años 90 y de cómo tán güei Les Cuenques. En fin… ¿Qué voi dicivos que nun sepiáis?
This work is licensed under a Creative Commons Attribution 4.0 International License.
