Nel hospital mierense la llista d’espera pa operaciones de cáncanu d’úteru supera’l plazu d’espera, independientemente de la fase del mesmu, con consecuencies mortales
Andecha Astur presentó una riestra entrugues al Conseyeru Salú del ‘Principado’ al rodiu de la situación sanitario nel hospital Hospital Vital Álvarez Buylla (Mieres), concretamente sobro la llista d’espera pa operaciones de cáncanu d’úteru, que, según fontes sanitaries, supera’l plazu d’un añu, dando lo mesmo que la paciente s’atope na fase 2 que na fase 3 d’esta enfermedá mortal.
La formación nacionaliega quier saber cuanto tiempu lleva careciéndose esta situación d’emerxencia sanitaria “que daña gravemente’l drechu les ciudadanes a una atención sanitaria de calidá y pon en pelligru’l so drechu a la vida” y si esi mesmu casu se da n’otros hospitales asturianos, entrugando a la Conseyería de salú les midies tomaes fasta agora pa enfrentar esto.
El casu agrávase, comu faen notar nes sos entrugues dende Andecha Astur, al sabese que’l xefe de la Unidá de Xinecología del Hospital Vital Álvarez Buylla opera éstes y otres patoloxíes nel ámbetu la melecina privao, siendo pa elli bien rentable que les enfermes se vean forciaes a acudir a la sanidá privao al nun ser atendíes na pública.
Con ello, resalten, crease un duple nivel d’atención sanitaria, en función del nivel económicu de los pacientes, contrario dafechu al conceutu de sanidá público universal, nel que les muyeres ensin recursos nun tienen opciones de seguir viviendo.
Andecha Astur lleva años denunciando publicamente coles sos campañes la situación de la Sanidá Pública Asturiana “a la que ta dexándose ensin recursos humanos y materiales, ta prevocando una situación sanitario que se paga en sufrimientu y vides humanes, y qu’a la fin nun persigue otru oxetu que la progresiba privatización de la sanidá público a base de desdexala y obligar a la xente enfermo a recurrir a la sanidá privao”.
Nuria Prendes
This work is licensed under a Creative Commons Attribution 4.0 International License.
