Recién lleiemos en prensa les recomendaciones del Principado pa que los axentes de mediu rural aforraren en combustible; dos robecos pagaron ya les consecuencies

Como yera de prever el cazadores furtivos tán aprofitando  la falta de xixilancia nos montes asturianos, por cuenta de les restricciones nel usu de combustible, p’actuar ensin control.

Va escasos díes afayáronse los calabres de dos robecos, muertos por ación del furtivismu nel Parque Natural de Somiéu, en concretu na carretera de Riera a La Pola Somiéu, anque  dende la Coordinadora Ecoloxista tarrecen qu’esto nun seya más que la punta l’iceber del furtivismu nestes selmanes ensin xixilancia.

Recordemos que la Conseyería de Mediu Rural comunicara a entamos de payares a la so Guardería del Mediu Natural qu’hasta’l mes d’avientu los vehículos nun podríen recargar combustible por un fallu burocráticu na contratación cola empresa suministradora. Asina, mientres tol mes de payares quedaba suspendía cualisquier llabor de xixilancia per parte d’estos axentes, que teníen de permanecer nes oficines y colos coches paraos.

Apocayá tamién denunciáren dende la Coordinadora Ecoloxista énte la Inspección Xeneral de Servicios del Principáu, que mientres l’añu 2021 la Conseyería nun tramitara les denuncies qu’efectuaren los guardes, colo  que la mayoría prescribieren. Dempués d’una investigación interna diérase-yos la razón, pero dixeron que nun había responsables. A cencielles, nun se tramitaren les denuncies, pero naide se fixo cargu del trafullu. A día de güei nun sabemos si se corrixós la situación o sigue pasando lo mesmo, la opacidá de la Conseyería nesta tema ye total.

La situacion debuxa un escenariu global de dexadez y neglixencia de la Conseyería de Mediu Rural al respeutive de la xixilancia y protección del mediu natural nel que l’estáu d’abandonu y precariedá nel que s’atopen los axentes  encargaos de xixilar y velar pola protección de los nuesos montes concrétase nel total desasistencia xurídica ante menacies y agresiones, nun parque móvil vieyu y esgonciáu que de cutio carez averíes, nuna falta de medios y material de trabayu, ropa d’uniforme escaso y de bien baxa calidá, desorganización alministrativa, denuncies que nun se tramiten, escasez de personal, places ensin cubrir, desmoralización del colectivu, etc., a lo qu’agora se sumó’l bloquéu total del trabayu mientres un mes por falta de combustible nos vehículos.

Alberto Rodríguez

This work is licensed under a Creative Commons Attribution 4.0 International License.