El docente declarare en delles ocasiones el so interés por esti xuiciu, nel qu’esperaba que s’esclariare quien o quienes cargaron con tantu enfotu contra’l so llabor, empeñando nello recursos públicos, y se-y compensare polos meses nos que tuvo priváu d’emplegu y sueldu
Un bon garrapiellu de docentes y ex-escolinos arropaba ayeri a Yván Pozuelo a la entrada del Xulgáu d’Istrución Nb 1 de Xixón onde se suponía que diba tener llugar el contenciosu contra la decisión del Principado d’inhabilitalu comu docente demientres ocho meses, sentencia agora reducía a seyes al contemplase el recursu de reposición interpuestu.
Yván Pozuelo con una de les sos ex-escolines
Sicasí, nun hebio xuiciu, ya que la conseyería nun citó a los testigos a declarar, una falta d’interés incomprensible depués del enfotu puestu en redautar un informe de 3.000 páxines contra’l docente pola so forma de trabayar, apináu, según el, de falsedaes.
La vista quedó atrasá al 23 de febreru, un retrasu que contrasta cola priesa que tuvieron primero p’allonxalu de los sos escolinos “Esa yera la urxencia d’apartarme de les aules pa nun dañar al alumnáu. Danme tres meses pa seguir dañándolos” declaró en redes Pozuelo, qu’agora exerce na Escuela d’Hostelería.
Llucía F. Marqués
This work is licensed under a Creative Commons Attribution 4.0 International License.
