Francisco Manuel Mallada reclamó ante la Xunta Xeneral el drechu de los pueblos a aprofitar unos montes que por llei son suyos

“Esti gobiernu socialista escacarexa como una pita de da-y recursos a la xente pa que nun marche de los pueblos ya’l mesmu tiempu espolianos los recursos que nos pertenecen con midies restrictives ya inquisitoriales ensin dengún sen. A dii de güei la Conseyería de Mediu Rural nun tien denguna intención de devolver los montes a los vecinos”

El pasáu doce d’avientu tuvieron llugar na Xunta Xeneral les comparecencies informatives acerca del Proyeutu de llei del “Principado” de Asturies de Presupuestos Xenerales pa 2023. Pente otres munches intervenciones nes que coleutivos perestremaos defendieron los sos intereses ante los parlamentarios, los vecinos de les parroquies rurales reclamaron un drechu que por llei yos pertenez, el de xestionar los sos propios montes comunales.

Francisco Manuel Mallada Rodriguez, cabezaleru de l’AAVV de les parroquies de Piñera, San Sebastian y  San Esteban, nel conceyu Morcín, punxo voz a esta reclamación, acusando al gobiernu de Barbón d’asonsañar esmolecese por repoblar les aríes rurales al tiempu que ñega a los vecinos los recursos necesarios pa vivir nelles.

Les prebes documentales de los aprofitamientos comunales del monte retrotráense a va mediu más de mediu mileniu nel que los vecinos continuaron xestionaron los recursos que’l monte-yos daba: lleña, rozu pa bullir al ganáu,  ñeve de los neveros que se vendía nel branu, pación pal ganao… toos estos aprofitamientos decidinse a Conceyu Abiertu, comu recalcó Mallada, fasta que cola llegada’l franquismu la Diputación ya l’ICONA robaron los montes a los vecinos, completando l’espoliu’l gobiernu asturianu d’IU ya’l PSOE nos años 90.

La intervención d’esos partíos “d’esquierdes” apioraron la situación, ya que si demientres la xestión del ICONA y la Diputación los vecinos siguieron trabayando y aprofitando’l monte ensin que naide se metiere con ellos, les coses tornaron dafechu cola xestión del gobiernu asturianu y del conceyu, onde los vecinos quedaron separtaos dafechu.

Los vecinos lleven años reclamando la recuperación de los sos drechos, consiguiendo va tres años que’l conseyeru, Alejandro Calvo se comprometiere a tornalos a les comunidaes vecinales, pero esi compromisu nun fraguó en fechos, pidiendo ca vuelta a los vecinos nueva documentación o alegando nuevos requirimientos.

Comu exemplu de la mala voluntá de la Conseyería destaca casos comu’l de les sos parroquies “que paez sacao d’un teatru de Valle Inclán”, onde la funcionaria Mª del Pilar Díaz Muñoz, istructora del espediente, pide que nel plazu de diez díes presenten una documentación que sabe que nun podrán presentar, ya que la tien ella na so conseyería, depués d’arramplar con tolos documentos orixinales de los montes que taben nel Archivu Hestóricu d’Asturies.

Otru casu mencionáu na intervención foi el del monte Grullomayor, de la Sierra de Tineu, que teniendo escritura del 1931 y sentencia de xuzgau de xineru del 2010 nel que se reconoz que l’aprovechamientu comunal pertenez a los vecinos de Buspaulín sigue ensin devolvese-y al pueblu.

Manolo Mallada retó a los partíos de la oposición a venceyar la firma de los presupuestos a que s’abra partía presupuestaria pa la clasificación de los montes, financiando un equipu multidisciplinar independiente dotau de recursos materiales y humanos pa tornar d’oficiu los montes, tal comu recueyen les sentencies del Tribunal Supremu. Especificó tamién qu’esa partía tendría de salir de los 200.000 € que se yos da a los sindicatos agrarios, a los qu’acusó de sumisos al gobiernu de Barbón.

Llucía F. Marqués

This work is licensed under a Creative Commons Attribution 4.0 International License.