Esta tradicional mazcarada d’iviernu foi recuperada nel añu 2.014, tres de 70 años ensin cellebrase
Ayeri cellebróse en San Xuan de Villapañada la primer mazcarada d’esti iviernu. Nella salieron a pedir l’aguilandu peles cases d’esta parroquia de Grau los maragatos, l’escobón, el vieyu y la vieya, el diañu, l’osu, el prietu, la cenicera, la dama, el caballeru, el cura, el gaiteru ya’l mélicu.
Estos personaxes foron recoyíos y rescataos d’una tradición cuasique perdía va cuasi diez años, gracies al llabor d’un equipu d’investigación etnográfica que consiguió la información de magar informantes de más d’ochenta años.
Caún de los personaxes cumple un papel na mazcareda: les collories parexes de maragatos baillen, l’escobón, vistíu con un cucuruchu y enagües blanques y llevando un ramu de lloréu, ye’l qu’entruga si dan o non l’aguinaldu; el diablu, con una cornamenta de vaca na tiesta y un forcáu, y l’osu, vistíu con pieles d’oveya, col so amu prietu, que son los qu’asusten. Acompánguenlos el vieyu y la vieya, que detien la comitiva pa parir un páxaru, la cenicera, que ye un home vistíu de muyer que lleva un sacu del que va tirando ceniza, la dama ya’l caballeru, el cura, el gaiteru ya’l mélicu.
La procesión foi de Rozadas a Acebéu ya d’Acebéu a La Llinar ya d’eiquí a San Xuan a rematar ente l’ilesia, onde se cellebró la función.
Alberto Rodríguez
This work is licensed under a Creative Commons Attribution 4.0 International License.
