Nel 2018 falábase de que’l xorrecimientu económicu asturianu taría perbaxo la media estatal, nel 2019 avisáben de que’l ralentizamientu taba siendo mayor que l’esperáu, neto que nel 2020 y nel 2021 Asturies carecía la pior cayía de PIB el Estáu, con un 0,5 de retrocesu.

Agora les noticies son que la economía asturiana medrará “más sele de lo previsto anicialmente” y entrugámonos cuanto pue llegar a ralentizase la cosa. El caberu informe, espublizáu por la Red Hispalink, na que participa l’equipu Hispalink-Asturies de la Universidá d’Uviéu y que coincide enforma colo espublizáo por BBVA Research pronostica qu’al xorrecimientu del PIB d’esti añu, un 3’5%  bastante afayaizu, siguirá’n 2023 una desaceleración, quedando en menos del ún por cientu (0’2 según el BBVA, 1’1% acordies Hispalink) y rozando con suerte’l 2% nel 2024. Ello implica qu’Asturies rexistraría, otra vuelta, les tases más baxes de xorrecimientu del Estáu nos dos años vinientes.

Por seutores, l’agricultura torna a ser el más castigáu, con cayíes del 13% dende esti mesmu añu y un amenorgamientu esperáu del 25,2% en tres años. La costrución tornó a cayer esti añu, un 1’5% y siguirá baxando, cuasi un 4% nel trieniu. La industria xorrecerá selemente, 1’4% nel 2023 y 2’1% nel 2024. El seutor servicios foi el que presentó’l xorrecimientu más bultable, siendo el responsable de la medría d’esti añu y previéndose avances del 1’3% y 2% pa los prósimos.

Los pronósticos difieren a la baxa de los fechos por estos mesmos organismos n’abril, indicando una deriva a pior.

Redaición InfoAsturies

This work is licensed under a Creative Commons Attribution 4.0 International License.