L’informe france delles idegues preconcebies, nin son foriatos, nin falta formación, nin l’emplegu ye la solución: el 14’3% de los probes severos tienen trabayu, el 73% tienen un nivel educativu mediu o altu, el 60% son del país
Los datos espublizaos pola Rede Europea de Llucha contra la probitú tornen ser llaceriosos: 109.300 asturianos viven con menos de 6.357 euros al añu. Porcentualmente, los “severamente probes” son el once por cientu de la población asturiana, que subsiste con menos de la metá de presupuestu de lo qu’una familia media española tien pa pasar el mes.
Cobrar 530 al mes, consideráo l’umbral perbaxo’l qu’una persona ye oficialmente mui probe, implica que’l 70% de los ingresos van en, cenciellamente, tener un techu. Si falamos de families, la cosa compícase: dos adultos con dos rapacinos tienen una media de 265 € al mes por persona, 173 cuando se trata d’una familia monoparental. D’ello resulta que los más perxudicaos por esta situación d’escasez severa afeuta con especial fuercia a la reciella.
La mocedá ye otru coleutivu especialmente perxudicáu, el 30% de los menores de 25 años carecen privación material, un terciu d’ellos nun puede calecer la casa nin mercar ropa o calzao.
Ye destacable qu’estes situaciones de probitú nun se solucionen alcontrando trabayu, el 14’3% de les persones que viven en situación de probitú severa y privación material tien un contratu llaboral que, sicasí, nun cubre col so salariu les sos necesidaes más básiques. Tampocu se trata de falta de formación, ya que munchos tienen un nivel educativu mediu (53,6%) o altu (19,5%). Si bien ye verdá que les persones que vienen d’otros llugares tienen más dificultaes económiques y carecen de la falta d’escudu social qu’implica nun tener familia cercano, más del 60% de los probes que viven n’Asturies son asturianos de nacimientu.
Redaición InfoAsturies
This work is licensed under a Creative Commons Attribution 4.0 International License.
