Investigaores del IMOMA ya’l Centru Mélicu descubren que la biopsia líquida permite personalizar los tratamientos contra’l cáncanu en más de la metá de los pacientes, pronosticar les probabilidaes de cura y prever el progresu de la enfermedá

La biopsia líquida consiste nun test xenéticu, realizau de magar una amuesa de sangre del paciente, p’algamar información de los tumores. Esti métodu meyora bultablemente los utilizaos fasta agora al non ser invasivu ya eliminando la necesidá de biopsiar el tumor. El descubrimientu correspuende al personal del Istitutu de Melecina Oncolóxica y Molecular d’Asturies (IMOMA) y del Centru Méliu, quienes identificaron los marcaores xenéticos que permiten esti avance

Nel estudiu, espublizáu el pasáu 22 d’avientu na prestixosa revista científica British Journal of Cancer, analizáronse los resultaos de más d’800 biopsies llíquides de cincuenta pacientes trataos nel Serviciu de Radioterapia, realizaes anantes, demientres y depués del tratamientu de radioterapia. La información acompangóse d’análisis xenéticos del propiu tumor y de los pacientes, que permitieron interpretar meyor los resultaos.

La conclusión ye que la biopsia llíquida apurre importante información del desendolcu de la enfermedá, permitiendo monitorizar el comportamientu del tumor ya identificar posibles terapies personalizaes en más de la metá de los pacientes analizaos. Cola biopsia, mesmo anantes d’entamar el tratamientu, ye posible pronosticar que pacientes tienen más probabilidaes de responder al tratamientu y curar, prediciendo posibles progresos de la enfermedá.