Una mesa, una máquina d’escribir de les antigües, un escaparate y un escritor que nun s’escuende, qu’escribe los sos poemes cara’l públicu. Esos son los materiales colos que se crea una performance lliteraria comu la que protagonizó ayeri Diego Solís
Coincidiendo col día de los Santos Inocentes el poeta xixonés Diego Solís autor de “Volvemos en 6 minutos” realizó ayeri un reality poéticu, na llinia de la so obra, nel que pasó cuatro hores roblando llibros y escribiendo poemes en directu na oficina de Cuatro Gotes Producciones.
“Volvemos en 6 minutos” ye’l títulu del caberu poemariu, recién espublizáu, de Diego Solís, una obra que va más p’allá de ser un llibru de poemes y que s’alcuentra nestos intres na so xera de promoción, con presentaciones yá feches en Xixón, Uviéu o Villaviciosa, ente otros. Trátase d’una obra onde nos alcontramos con una llectura fácil y que viaxa ente la televisión y lo dixital. Como nun podía ser d’otra manera, Volvemos en 6 minutos anicia’l so camín dende la Televisión del Principáu d’Asturies y con daqué tan clásicu de la cadena como una película de vaqueros que viaxa hasta Les Vegues y el so famosu cartel, anque nesti casu fálase de Corvera, non de Nueva York.
TCM, Netflix, HBO… toda una montonera de plataformes y canales colos qu’esfrutar o fadiar tienen sitiu nesti proyeutu a mou de crítica social con películes y series, como La Naranxa Mecánica, Black Mirror (espeyu negru) o La Llamada, ente otres.
Alberto Rodríguez
This work is licensed under a Creative Commons Attribution 4.0 International License.
