Demientres miles d’asturianos se ven forciaos a colar tolos años, con cientos de miles na diáspora y col interné lloñe d’aportar a tolos núcleos rurales, Barbón llama a urbanites foriatos a venir a vivir n’Asturies comu “nómades dixitales”

La campaña del “Principado” torna a insistir na idega del paradisu, pero pa otros. Nesti casu pa “nómades dixitales”, que vengan a Asturies de pasu, a sentase pente vaques a facer el so teletrabayu.

La campaña ensiértase dientro’l programa “safework paradise” y comu espeya’l so propiu nome ta lloñe de tar destinada a asturianos. Nuna web estrada d’anglicismos innecesarios, na que tan vetaes la cultura, la llingua o cualisquier cosa que güela a Asturies y nun seya un prau, ufren a visitantes del mundiu a esfrutar de los perguapos paisaxes y la “calidá de vida y servicios” qu’ufre’l país. Asturies ye pa ellos pocu más qu’un escenariu idílicu, un gran hotel a dimposición de quien venga nel que’l paisanaxe astur -especialmente’l rural- nun tien más espaciu que’l de servir al veceru.

Una publicidá que amás de dexar de lláu a los moraores rurales d’Asturies, ye engañosa. Non, n’Asturies rural nun cuntamos con “escelentes servicios” , falten comunicaciones físiques y dixitales, falta sanidá, falten colexos, falta tresporte públicu…y falta interné, daqué ensin lo que se ve complicao ser un nómada dixital.

Si bien ye cierto que la coneutividá meyoró nos cabero años, los datos que presumen de que’l 92% de la población asturiana tien interné de calidá disponible na so fastera básense nun estudu qu’omite que pa facer esi cálculu nun cuntaron, a costafecha, con 50.000 asturianos “qu’habiten en zones pocu acesibles o remotes”. L’estudiu, amás, ta fechu a pie de carretera y nun garantiza la más mínima señal en monte.

De fechu, y según datos oficiales, namás el 25% de los llares en llocalidaes de menos de 500 moraores tienen interné. 3.700 llocalidaes carecen de conesión aceutable y les “zones orográfiques complicaes” incluin conceyos enteros, comu Ponga, Sobrescobiu, Tineo, Degaña, Yernes y Tameza, Ibias, Cangas, Peñamellera Alta o Cabrales, por citar dalgún.  Pero tampocu los conceyos definios comu “de cobertura escelente” la tienen nes sos fasteres rurales, incluso nos conceyos más céntricos y poblaos hai zones ensin acesu a interné y dase’l casu de grandes manches blanques nos mesmos conceyos d’Uviéu y Xixón.

En resume, Barbón torna a tratar d’atrayer con trampes a una inmigración foriata que nun sedría necesaria de poder vivir bien los asturianos n’Asturies. Estraña esa zuna -tan asemeyada a la importación de xente del sur d’españa nos tiempos del franquismu- de querer repoblar Asturies con xente d’afuera.

Redaición InfoAsturies

This work is licensed under a Creative Commons Attribution 4.0 International License.