Cuando vemos que les principales afeutaes pola falta d’emplegu y la precariedá son les muyeres pente 16 y 25 años vese un pocu más nidiu’l motivu de la baxa cifra de ñacencies nel país
Dende la prensa oficial lleemos una interpretación de los datos de la EPA trunfalista y autocomplaciente. Si, hai una información anicialmente positiva, o non tan negativa. N’Asturies el paru baxó esti añu un 4’5% -alrodiu la metá de lo que baxó en media l’Estáu, un 8’5%-. N’avientu “namás” hai n’Asturies 61.887 persones privaes d’emplegu, 2.911 paraos menos que l’añu pasáu peles mesmes feches. Matiz: tamién hai cerca de 9.000 persones menos n’Asturies nel mesmu periodu.
Amás, la EPA espeya que’l paru pente la mocedá (de 16 a 25 años que ten apuntaos al paru y nun topen trabayu pesi a buscalu) disparóse del 19,85% nel 2.008 al actual 43,35% . Ehí tenemos el primer factor de despoblamientu: la emigración pocu menos que forzosa de la mocedá asturiana ante escasísima posibilidá d’algamar un puestu de trabayu, nun digamos ún en condiciones dignes.
Por xéneru, el desemplegu baxó en 3.360 homes y medró en 1.682 muyeres, agrandando la fienda económica por sesu. Si anantes veíemos el fallu migratoriu, agora enfrentamos el decrecimientu vexetativu. Ensin escaecer que’l 60% de les asturianes tan fuera de la edá afayaiza pa tener fios, ye complicao plantegase tenelos cuando la decisión más urxente ye saber si s’emigra a la gueta trabayu o se sigue esperando’l milagru d’un emplegu estable n’Asturies. En cualisquier casu, el xacíu nun recomienda tener descendencia cuando nun hai con que caltenela.
Orientar los planes de creación d’emplegu a la mocedá y les muyeres asturianes abulta una cuestión fundamental a la d’enfrentar el famosu retu demográficu, una estratexa que, personalmente, considero muncho más efeutiva que llamar a la inmigración en masa, a sabiendes de que, una bones equí, tampocu tendrán de que vivir esos inmigrantes.
Redaición InfoAsturies
This work is licensed under a Creative Commons Attribution 4.0 International License.
