Familia, vecinos y l’Asociación del Horru Asturianu amosaron la so intención de recostruir l’horru dende’l primer intre, cuando n’ochobre del 22 un camión lu baltare. Sicasí, va tres meses del acidente y dende proteición del padremuñu nun aniciaron los movimientos pa ponelu en pie. L’aseguradora responsable de la obra tampocu da rempuesta y entantu les pieces, tapaes malamente con una llona, continuen el so deterioru.

Conocíu comu l’Horru de Fonso, el de Sama de Gráu yera un de los 12 exemplares dataos del sieglu XVI, destacáu amás pol policromáu de los sos debuxos.  Recoyíu dientro de los horros de proteición preferente, esta pieza tendría de tar protexía d’antemán ya en cualisquier casu les aiciones de recuperación del mesmu tendríen d’aniciase darréu l’acidente, siendo responsabilidá de l’alministración encargase d’ello.

L’avezada desidia qu’acompanga a los responsables del curiau del padremuñu asturianu condergará posiblemente a esta xoya arquiteutónica al so desaniciu.

Otru horru, esti ensin catalogar oficialmente, amburó esti fin de selmana na llocalidá piloñesa d’Areñes, quedando desaniciáu dafechu ya ensin posibilidá de ser recostruyíu.