Begoña Tamargo lleva siete años lliderando una llucha sofitada pola llei pa recuperar lo que-y pertenez, pero reconoz que si nun se xunen tolos que tan na mesma situación pa denunciar el cobru illegal de comisiones a los mileuristes, nun se van conseguir cambios

¿Como ta siendo’l procesu? Cúntanos la esperiencia.

Llevo dende’l 2017 nesta llucha y dacuando devuélvenmelo y otres non pero nesti casu nos postreros dos años nada.
El procesu sigue igual, nun nos faen casu, asina de claro. Como si nun tuviera les puertes del bancu abiertes, más o menos. Va pocu fui a pidir los estractos de los postreros 3 años y yá ponen ende que me van a pasar los 40€ de comisión el mes que vien, vamos que nin se corten.

Fui al bancu a pidir los estractos y depués al bancu d’España a poner la denuncia, presentándolos comu preba. Dende’l Bancu d’España yá me respondieron, agora queden unos díes pa que respuenda’l BBVA. Dende’l Bancu d’España lo que me vienen a dicir ye qu’ellos van  pidir al bancu que-yos dean los papeles y a ver qué contesten… pero qu’ellos nun pueden faer na, qu’ellos lo único que pueden ye dar una información afirmando si teo o non razón, pa que yo vaiga con ello al xuez y como ya pasó una vegada, toi cierta de que nun voi  tener  razón pal bancu d’España.
De los trabayadores del bancu teo de dicir qu’hai una directora perprestosa, una persona con calidá humana; los otros dos trabayadores qu’hai, homes, nun tienen calidá humana nin educación nin nada asemeyao. Yo entiendo que dende los xefes d’arriba yos aprieten les tuerques, pero eso nun quier dicir que nun tengan educación nin pa dicime bonos díes

¿Tán respetándose les lleis o son reticentes a reconocer el casu?
Yá vos contesté un poco na primera, pero p’aporfialo, non. Non porque tou sigue igual. Yo nun sé qué asocede con estes lleis nin se quien les tien que controlar o quien les tien de facer valir, é pero nun sé tán respetando. Realmente esto ta pasándo-y a bien de persones. Les lleis dicen una cosa pero depués argumenten con otres y yá atopé a munchos mileuristas como yo que me dicen que’l bancu tamién-yos cobra intereses entós… Mira los bancos tán faciendo los que quieren, parte de la población nun s’entera, otra nun quier enterase y otra prefier perder 1000-2000€ que movese y reclamar, deben d’espertase con ellos na mesina, porque yo pa ganalo tengo que trabayar 30 díes y nel mio casu nin siquier ganar. Por eso dacuando hai que batallar y nun dexase triar por tou.

¿Cuál ye la to situación actual, que reflexa del sistema bancariu?

La mio situación ye la siguiente, yo soi una trabayadora d’un sector bien precarizáu, que de fechu tuvimos 35 díes en fuelga pa consiguir un conveniu que ye malpenes una migaya meyor que l’orixinal, gracies a los sindicatos que se rieron de nós. Cobro 545 €/mes, trabayaba 20 hores pero dende la fuelga castíguenme y agora tengo 14 hores selmanales y nun me dan más. Y la alministración, ye quien tien la culpa de too esto metiendo a empreses que solo quieren facturar con tal d’aforrase unos euros. Nun puede incluyise empreses privaes nel sector públicu, elles cobren a 22€ la hora y les que trabayamos 6€.
Esto va de pena y la xente, nin movemos nin implicamos en nada. Pa mi hai trés coses importantes na vida, observar, empatizar y actuar, y eso nun lo tamos faciendo, o facémoslo bien pocos… Asina nos va.

Un mensaxe dende’l to puntu de vista pa los nuesos llectores
Que nun nos dexemos pisar los nuesos derechos, qu’hai qu’actuar, ser más solidariu cola xente que tien estos problemes, sobretou si tu tamién los tienes, avérate, la unión fai fuercia, pero nun mires con pena, nin nos deseyes suerte, solo xúnite a nós si tamién te ta pasando y vamos media hora al mio bancu depués media al tuyu. Hai que reparar empatizar y actuar, por eso dígo-y a la xente que non, que nun camude’l so dineru de bancu, sinón que se xunan y reclamen lo que ye so, y si nun lu consiguimos vamos dir toos xuntos al Bancu d’España, porque ensin xunión nun faemos na. Vivimos nun país que se sostien sobre los probes mientres se rien de nos, y nos, consentimoslo”

Nel Dos Santos

.

This work is licensed under a Creative Commons Attribution 4.0 International License.