La presentación tuvo llugar nel Cientru Municipal Xixón Sur, nel marcu del Musoc, ante la negativa de toles sales de cine asturianes d’incluyila na so cartelera.

Ainhoa lleva al espectador per dellos de los principales escenarios de la hestoria del fin de sieglu, nun thriller políticu que denuncia la relación pente’l tráficu de drogues, imperialismu y contrarevolución

Fermín Muguruza (Irún, 1936), autor de cómic, cineasta, músicu y, sobre tou, axitaor de conciencies, visitó Asturies pa presentar la so película más reciente. Ainhoa ye la segunda parte de Black is Beltza (Black ye Prieto) y tien comu protagonista una una moza valiente, fuerte y comprometía, que france dafechu colos roles avezaos de les muyeres en cine. Ñacía en La Paz que y tres de vivir en Cuba, Ainhoa viaxa a la tierra’l so pa, Euskadi, conociendo de primer man la brutalidá policial y la movilización social que marcó  los años 80. Ellí alcuentra a Josune, periodista del diariu Egin, que sedrá la so compañera d’aventures nun viaxe que les llevará pel Llíbanu, Afganistán y Marsella, implicándoles nos estremaos conflictos vixentes naquel intre y nes redes del narcotráficu, denunciando el venceyu d’estes coles trames polítiques de los EEXX y los sos averaos.

La película, apinada d’información hestórica de la qu’al sistema nun presta sentir, retrata con crudeza y tenrura l’escenariu global de los caberos tiempos de la Guerra Fría, polo que Fermín Muguruza considera un trunfu qu’entrare nominá a los Globos d’Oru, franciendo la muria cola que se fae por acallantar cualisquier obra de denuncia política. Nel alderique que se desendolcó darréu la proyeición el cineasta tuvo pallabres d’alcordanza pa Pablo Hasel y Valtonic, represaliaos por dicir la verdá, y dexó cayer la posibilidá d’una collaboración futura con Xune Elipe, cantante de Dixebra, ensin dar más pistes sobre la natura d’esa collaboración.

Llucía F. Marqués

This work is licensed under a Creative Commons Attribution 4.0 International License.