Depués de la mención especial recibía nel Festival de Cannes, Xixonomía sigue resaltando pola so forma de presentar la ciodá con una nominación na Feria Internacional de Turismu, qu’anguañu cellebra la so edición 43ª. La otra nominación correspuende a la ferramienta de xestión de datos turísticos Data Lab
Visita Xixón ye finalista en dos de los premios que s’entreguen nel marcu de la cuarentaytresava edición de los premios FITUR: los AMT Smart Destinations Awards y los premios IATI 2023 a la escelencia na comunicación dixital.
El direutor de Visita Xixón, Daniel Martínez Junquera, va ser quien defienda la candidatura de Xixón Data Lab güei a les 16:00 hores, nel Pabellón 10B del recintu ferial d’IFEMA, nel marcu de FITURTECHY, onde se decidirá si Xixón recibe ún de los AMT Smart Destinations Awards, convocaos pol Instituto Tecnológico Hotelero xunto cola AMT de Sol y Playa. Estos premios distinguen les soluciones anovadores y ferramientes teunológiques, ya implementaes, qu’aiden a los destinos turísticos a frontiar los retos de convertise nun Destín Turísticu Intelixente (DTI). Nesti casu, Xixón ta nomináu na estaya de Xestión integral del destín pola so ferramienta de xestión de datos turísticos Gijón Data Lab.
Xixonomía podría ser premiada col gallardón IATI a Meyor creación de conteníos d’empreses ya instituciones turístiques mañana vienres. Los Premios IATI, convocaos pola Asociación Nacional de Bloggers y conocíos yá como los “Goya de los viaxes”, gallardonen a los meyores creadores de conteníu en blogs, webs, redes y plataformes sociales nel sector de viaxes na Península, y son yá una referencia auténtica pa los creadores de conteníu y profesionales del Turismu en toles sos variantes. Visita Xixón ta nomináu pol conteníu dixital xeneráu referente a la promoción turística de la ciudá, tanto en plataformes sociales como na web, ente lo que s’alcuentra tolo venceyao cola campaña de Xixonomía en 2022.
Los premiaos de cada estaya, esbillaos por un xuráu profesional de comunicación y marketing dixital, van asoleyase’l vienres 20 xineru nel hotel Puerta América de Madrid, nuna gala dirixida por Roberto Leal xunto a José Pablo García, autor de la web de viaxes “A tomar por mundo”, y qu’aconceyará a los meyores profesionales de comunicación dixital de viaxes del Estáu.
Alberto Rodríguez
This work is licensed under a Creative Commons Attribution 4.0 International License.
