La Fábrica d’Armes de La Vega ye’l más emportante complexu de padremuñu industrial públicu asturianu, abandonáu  y desprotexíu, siendo poles sos carauterístiques un complexu de gran valir arquiteutónicu ya hestóricu, con estremáu valir  na comprensión del orixen de la ciudá ya’l so desendolcu de raigañu obreru, enforma condicionáu pol trabayu na fábrica en tiempu de la revolución industrial.

Sicasí los poderes públicos que tienen la responsabilidá de protexer, aprofitar y dar puxu a estes istalaciones prioricen l’interés económicu per delantre de cualquier otra consideración. En pallabres de Manolo Maurin, profesor titular de xeografía de la Universidá d’Uviéu  “Alcordaron trocealo, repartilo, desvirtualo y mercantilizalo  a espaldes del pueblu uvieín, que ye’l so llexítimu herederu”.

El protocolu robláu esti branu nun dexa llugar a dudes no que cinca a les intenciones especulaores y les sos consecuencies sobre esti padremuñu industrial ya hestóricu únicu, incluyendo’l baltu de dalgunos de los edificios del conxuntu hestóricu.

Tou ello tuvo la virtú de xunir al pueblu uvieín y asturianu, que presllen files contra esti nueu ataque al so padremuñu -y con ello a la so hestoria ya identidá-, entamándose de magar el conocimientu d’esti proyeutu delles movilizaciones. La prósima sedrá esti sábadu 28 de febreru, a la una la tardi delantre la Presidencia del Principado, n’Uviéu.