Na obra Ramón d’Andrés acusa a los llingüistes de falta d’enfotu y fae una reflexón sobre’l pocu algame que los sos estudios tienen na sociedá
“Una ciencia ensin enfotu”, de Ramón d’Andrés, ye la obra ganadora del Premiu «Máximo Fuertes Acevedo» d’Ensayu 2021. En palabres del propiu autor, esti llibru ye una reivindicación de la llingüística científica y del so papel na cultura de la sociedá. Asina, la ciencia ensin enfotu nun ye otra que la llingüística, na que nin siquiera los propios llingüistes foron quien a a esparder los sos conocimientos a la sociedá, permitiendo col so desenfotu qu’alredor del llinguaxe humanu y de les llingües sigan creyéndose coses qu’habríen tar superaes depués d’un sieglu de llingüística científica -comu por casu, qu’hai unes llingües con más drechos qu’otres-.
Na entrega del premiu el xuráu destacó la obra como «un manual básicu p’abrir los güeyos de cualquiera, filólogu o non, sobre la ciencia y la non-ciencia que consumimos, asimilamos y creyemos al falar de llingües»
La presentación del llibru va tener llugar el prósimu xueves 26 de xineru a les siete la tardi, nel salón d’actos de la Biblioteca d’Asturies «Ramón Pérez de Ayala» (Biblioteca d’El Fontán), asitiada na plaza Daoiz y Velarde, 11, d’Uviéu .Pa esta ocasión l’autor tará acompangáu pol profesor de la Universidá d’Uviéu Alfredo Álvarez.
Alberto Rodríguez
This work is licensed under a Creative Commons Attribution 4.0 International License.
