En 2022 el paru apioró n’Asturies un 48% más que n’España, un datu que condensa la descomanada diferencia de velocidá pente la recuperación estatal ya’l progresivu fundimientu asturianu de la man de los sucesivos gobiernos del PSOE. Nel seutor públicu retayáronse 13.700 emplegos. Nun s’esmolecer, Adrián Barbón fae tuits perguapos

Los datos de la EPA del caberu trimestre del 2022 son llaceriosos, el desemplegu medró n’Asturies un 13’4%  frente al 1’5% de media estatal. El paru medró en 7.600 persones nel caberu trimestre, desaniciándose 2.200 puestos de trabayu nel seutor servicios, 1.300 na costrución y 300 na industria.

Considerando los datos interañales, el desastre ye entá mayor, siendo destacable la fienda que s’agranda pente la meyora de los datos n’España, con una meyora del -2’6% de paraos y l’apioramientu xabaz n’Asturies, con un 45’3% más de paraos.  A finales d’avientu había 20.000 persones más en paru que n’avientu del 2021, lo qu’implica que la tasa de desemplegu sube 4’4 puntos, fasta’l 14’39%, tanto pente homes comu pente muyeres. Destaca la destrucción de 13.700 emplegos nel sector públicu, mientres que’l sector priváu pierde 1.400. Sicasí el problema más urxente ye la tasa de paru pente la mocedá, que se cuadriplica dende l’añu pasáu, algamando la xabaz cifra de 47,53% . Ello ye asina porque Asturies tien el menor relevu xeneracional llaboral del Estáu.

Más datos esmoleceores: Asturies perdió nos caberos 15 años 61.900 moraores de 16 o más años y de los que queden namás trabaya o busca trabayu el 50’45%  , lo qu’implica la tasa d’actividá más baxa del estáu. El paru de llarga duración asciende al 44,9%; sube l’emplegu a tiempu parcial dica’l 13,2% y nel 10,30% de los llares nun trabaya denguna persona. Amás Asturies tien namás 1’30 trabayaores activos por pensionista.

Non solo ye escasu el trabayu, sinón de mala calidá, con condiciones precaries y estabilidá nula. Nel seutor servicios, el más activu llaboralmente, camareros, llimpiadores y dependientes disparen los contratos “fixos discontinuos”, la solución perfecha pa que en cifres apaezan comu contrataes persones que trabayen namás en momentos puntuales a lo llargu l’añu.

La rempuesta a estos datos dende la Presidencia de Gobiernu son unos tuits perguapos afalando a la xente, asturianos o non, a venir a trabayar al paradisu. Daquién tien qu’avisar a Barbón de que, pa trabayar, faen falta puestos de trabayu.

Llucía F. Marqués

This work is licensed under a Creative Commons Attribution 4.0 International License.