El concursu, que cuenta cola collaboración de Central Lechera Asturiana, nun ye un concursu de cocina y tien como envís dar a conocer l’8º principiu de la Xixonomía: “L’área d’un cachopu ye igual a base por altura, partíu por dos”
Puestos a ser orixinales, Xixonomía convoca un concursu de cachopos nel que nun se premia al meyor cachopu, pa propocionar Xixón, pero con final fuera de Xixón. Porque Xixón ye diferente, ellí saben que “L’área d’un cachopu ye igual a base por altura, partíu por dos” y quieren esparder esi conocimientu pel mundiu.
Poro en llugar d’enfrentar a cocineros, el I Concursu de Cachopos #Cachopomía ta emponináu a creadores de conteníu ya influencers de viaxes y gastronomía de perdayuri, que recibirán de magar la selmana viniente, un paquete colos ingredientes básicos ya instruiciones pa cocinar el cachopu al estilu de la Xixonomía (carne d’I.X.P. Xata Asturiana y quesu en tayaes especial pa cachopu de Central Llechera Asturiana), colos que tendrán que cocinar un cachopu’n direutu pa les sos redes..
Nel concursu van participar hasta 80 periodistes, blogueros/es y líderes d’opinión, que se comprometen a espublizar un vídeu u otro/s formato/s cola ellaboración del cachopu nes plataformes.
La iniciativa va sirvir pa xenerar redes de collaboración y algamar prescriptores nuevos pa esparder la Xixonomía, promocionar Xixón como destín gastronómicu y fomentar el consumu de productos llocales. “Ye una aición que vien a reforciar el trabayu de Visita Xixón p’afitar el destín y la marca Xixonomía ente creadores de conteníu ya influencers de viaxes y que ta dando tan buenos resultaos. Reconocióse asina en FITUR col premiu IATI que recibió Xixón a la Meyor creación de conteníos d’empreses ya instituciones turístiques”, comenta Santos Tejón.
Los aspirantes van tener hasta’l 12 de marzu pa ellaborar el so cachopu y compartir el procesu nes sos plataformes. A partir d’esi día, un xuráu de xixónomos y xixónomes espertes, designáu por Visita Xixón y Central Llechera Asturiana, van esbillar cuatro finalistes. Estos pasarán direutamente a la final del campeonatu, onde tendrán de realizar el so cachopu en direutu. Va ser en Madrid el 20 d’abril de 2023, nun eventu qu’axuntará a una montonera de creadoress de conteníu ya influencers y nel qu’habrá más sorpreses nel marcu de la Xixonomía.
Quien gane va llevar un viaxe a Xixón, una visita a la Cueva’l Molín, onde se madura’l quesu Cabrales de Central Llechera Asturiana, y una mochila de viaxe de 1 000€. Y tamién va consiguir un pase direutu a la final del III Campeonato Amateur del Auténticu Cachopu Asturianu, entamáu por Central Llechera Asturiana cola collaboración d’I.X.P. Xata Asturiana.
Redaición InfoAsturies
This work is licensed under a Creative Commons Attribution 4.0 International License.
