Andecha Astur y la Coordinaora Ecoloxista d’Asturies consideren que’l nueu miraor ye un fautor de riesgu y desixen les másimes garantíes pa Munieḷḷos, Reserva UNESCO de la Biosfera. La formación nacionaliega reclama un Reglamentu urxente d’acesu y usu y, comu solución global, una Llei de Turismu Caltenible
Ḷḷagunas de Munieḷḷos, el nuevu miraor asitiáu nel Picu Candanosa, representa al entender d’estes organizaciones un riesgu importante y ciertu pal caltenimientu seguru de la viesca, padremuñu natural d’Asturies y Reserva UNESCO de la Biosfera. Sicasí, ta na llinia la política turística aplicá pol FSA-PSOE, masificadora y dañible pal entornu, enfrentada a la visión respetuosa defendía por Andecha na so propuesta de Llei de Turismu Caltenible, que lleven años proponiendo inutilmente al gobiernu d’Asturies.
Dende Andecha Astur consideren una irresponsabilidá permitir l’acesu llibre al miraor, permitiendo’l trásitu incontroláu y masificáu y posibilitando l’apaición de conductes delictives, comu’l furtivismuo la piromanía que pongan en riesgu esta biesca, una de les mayores ayalgues ñaturales d’Asturies. Por ello desixe al presidente Adrián Barbón “que dedique dalgo del tiempu qu’invierte na so precampaña elleutoral presonal pa iguar soluciones pa Munieḷḷos” proponiendo comu midía urxente, l’aprebación d’un Reglamentu d’acesu y usu del miraor, que fixe una cifra másima diaria de visitantes y afite dalgunes midíes básiques pa la seguranza y control del llugar.
Esti Reglamentu, aporfien, “nun sedría más qu’una rempuesta puntual y aisllá a un problema xeneral del nuesu país, que necesita con urxencia una Llei de Turismu Caltenible que defina, afale y asegure un nueu modelu de turismu, respetuosu cola identidá y el padremuñu”.
Redaición InfoAsturies
This work is licensed under a Creative Commons Attribution 4.0 International License.
