Alborecemos una vegada más col cielu escampláu y xelando no fonderu los valles con unes temperatures que tan alarodiu de los 0ºC, rexistrándose nel puirtu Payares 1,2ºC.
Güei vamos seguir col cielu poco nuboso o escampláu con unes temperatures que van camudar poco con un ambiente mui afayaizu en zones de montaña baxo la llume del sol del mediudía, mentantu na costa l’aire nordés va dexanos una sensación térmica fría y desagradable.
Mañana domingu habrá dalgún intervalu nuboso que velará’l sol parcialmente y fadrá que les temperatures mínimes suban dalgo, amás l’aire nordés pue ser cafiante tantu na costa como en zones altes de montaña, baxando la sensación térmica.
El llunes descenderán les temperatures mínimes y el cielu va quedar poco nuboso y el martes la entrada d’una masa d’aire mui fría continental fadrá baxar les temperatures abondu, esti día alborecemos a baxo ceru na mayor parte d’Asturies col cielu poco nuboso pero yá pela tarde va dir entrando nubosidá y a últimes hores pue dexanos precipitaciones febles que sedrán de nieve nel riscar del miércoles mui abaxo, sobre los 200m pero como la masa d’aire ye continental y seca les precipitaciones van ser febles y disperses con mayor probabilidá nel oriente asturianu. Asina y too ye una situación coyida con pinces, hai tovía muncha dispersión nes configuraciones de los modelos meteorolóxicos, amás el miércoles alboreceremos de nuevu con escasa nubosidá y xelando en prauticamente toa Asturies. Taremos sollertes a esta micro invernada ya seguiremos informando.
Que paséis un bon sábadu collacies ya collacios.
Semeya, espectacular, de Pablo Ruiz Photography, de Fuente De en Picos d’Europa, cuyida na so espublizacón de facebook.
This work is licensed under a Creative Commons Attribution 4.0 International License.
