Alborecemos col cielu poco nuboso o escampláu ya con unes temperatures que tan alrodiu de los 0ºC, rexistrándose nel puirtu Payares -2,1ºC.
Güei una pequeña bolsa d’aire fríu va cruzar Asturies del oriente al ocidente apurriéndonos un aumentu de la nubosidá que mos dexará precipitaciones febles durante la tarde-nueche, amás les temperatures van descender bultablemente y la cota de nieve pue situase perriba de los 400m. L’aire nordés va seguir cafiante nel llitoral y zones altes, baxando entovía más la sensación térmica.
Mañana miércoles alboreceremos col cielu poco nuboso o escampláu y xelando na mayor parte d’Asturies, muncho precuru coles posibles plaques de xelu que se formen por mor de les precipitaciones de güei a últimes hores, que tantu en forma de nieve como de lluvia puen conxelase durante’l prósimu riscar, dexando delles zones con una bona capa de xelu. Pel día la llume del sol calecerá l’ambiente faciendo que suban les temperatures másimes.
El xueves vamos tener dalgún intervalu nuboso a partir del mediudía na metá norte d’Asturies con unes temperatures mínimes n’ascensu, mentantu les másimes baxarán llixeramente.
El vienres y sábadu volverá a quedar escampláu y a xelar no fonderu los valles y paez que’l domingu pue aumentar la nubosidá pero esto yá lu diremos viendo.
Pa más a llargu plazu paez que l’atmósfera quier dar señales de movimientu gordu por mor d’un calecimientu de sópitu estratosféricu que fadrá que se dixebre’l vórtice polar y se reviertan los vientos zonales, los sos efeutos los veríamos yá de cara a finales d’esti mes principios del viniente, seguiremos sollertes.
Que paséis un bon martes collacies ya collacios.
Semeya del nuesu collaciu Luis Alfredo de la Casa Mieres nel puirtu Pinos.
This work is licensed under a Creative Commons Attribution 4.0 International License.
