La contradición pente les declaraciones del presidente y la realidá asturiana ye tala que daría pa camentar, como ya se comentó den dalguna ocasión, nun posible trestornu d’identidá disociativa. Sicasí, ye más factible camentar que se trata d’un arteru sistema pa facer creer a la sociedá asturiana una descomanada riestra de mentires descaraes

Un repasu per alto de les declaraciones d’Adrián Barbón na cabera selmana amuesen que’l presidente o bien tien una fonda desconesión cola realidá o bien ríse de los asturianos.

Entamamos pola sanidá. Metanes toles movilizaciones de personal sanitariu y pacientes, a los qu’inora sistemáticamente, permítese presumir de bones condiciones llaborales, llamando a personal foriato a trabayar a Asturies y definiendo el tratu n’otros llugares comu “Deficitariu dafechu y n’ocasones insultante” definición que tamos ciertos que los trabayaores del HUCA, Cagüeñes, Alvarez Buylla y cualisquier otru cientru sanitariu d’Asturies firmarien comu afayaiza pa resumir el tratu que reciben de l’alministración sanitaria nel so díi ente díi.

Ensin salir de la sanidá, el mesmu home que facilita y afala la creación del macrocientru sanitariu priváu Quirón en Xixón, del mesmu partíu que lleva décades derivando pacientes hacia la sanidá privada, permítese mencionar qu’hai “Comunidaes autónomes que prefieren el debilitamientu de la sanidá pública en favor de la privada”.

Remata la xugada, ya fuera del ámbetu sanitariu, al defender ensin vergoña denguna la xestión fecha de los fondos de la Xunión Europea “L’Executivu dientral púnxonos d’exemplu de la xestión de fondos”, diz, arguyosu de la palmadina nel costáu por parte los sos amos, entantu nos xulgaos se desendolca un macroxuiciu pol desfalcu millonariu de Fondos Europeos nel casu Muselón. Intenta con ello silenciar l’informe de la Sindicatura de Cuentes que dexa n’evidencia la xestión que se ta faciendo de los fondos europeos del Plan de Recuperación y que fala de riesgu na xestión de les conseyeríes, cuestiona la planificación, destaca la inseguridá xurídica por mor de la dispersión normativa, considera que nun se tan cumpliendo los mínimos de tresparencia, deteuta falta de personal y denuncia déficit de cumplimientu.

Toes eses declaraciones feches, por supuestu, nun perfechu español, porque l’asturianu nun se usa más que nel menutu escasu dedicáu de xemes en cuandu a decir qu’elli ye un gran defensor del asturianu. Presidente nun voi decir que seya bonu, pero p’actor nun tien preciu.

Llucía F. Marqués

This work is licensed under a Creative Commons Attribution 4.0 International License.