Bonos díes, bona xente.

Alborecemos col cielu poco nuboso o escampláu y xelando en munches zones d’Asturies con unes temperatures que tan alrodiu de 1ºC, rexistrándose nel puirtu Payares -2,5ºC, destacando los -4,4ºC de Perlín en Trubia o los -20,8ºC de la Vega Lliordes en Picos d’Europa.

Güei vamos tener un día soleyeru col cielu azul intensu onde les temperatures fríes de l’alborada van dir caleciendo, cola llume del sol del mediudía, pa dexanos un ambiente afayaizu a primera hora de la tarde. L’aire sedrá variable y sele con predominiu del nordés nel llitoral onde pue ser dalgo molestu.

Mañana sábadu volveremos alborecer col cielu poco nuboso o escampláu y xelando na mayor parte d’Asturies, sicasí la entrada de vientu de componente sur n’altor va facer que nun desciendan tantu les temperatures nos puertos de montaña, mentantu no fonderu los valles les xelaes por iversión térmica sedrán más intenses. Durante’l día la llume del sol volverá a calecer l’ambiente pa dexanos unos hores centrales del día mui prestoses y afayaices, onde ascenderán les temperatures másimes con respeutu a güei, amás l’aire sedrá sele ya variable.

El domingu sedrá un copia-pega al sábadu, con xelaes n’alborada, muncho sol durante’l día y temperatures n’ascensu llixeru que mos van dexar un ambiente mui agradable, al sol, a primera hora de la tarde.

Pali que pali va confirmándose’l caleciminetu de sópitu estratosféricu intensu que podrá provocar la dixebración del vórtice polar y la reversión del vientu zonal, provocando que la circulación atmosférica tienda a ser d’este a oeste, averándonos el fríu siberianu de cara a finales d’esti mes, entamu de marzu, otra cosa ye que mos llegue, pero esto yá lu diremos viendo.

Que paséis un bon vienres y una bona fin de selmana collacies ya collacios.

Semeya del picu Remelende , dende’l puirtu Tarna que mos apurre’l nuesu collaciu Ezequil Sánchez.

Munchu precuru cola nieve y la montaña, a esfrutar pero con cabeza.