El delanteru Sportinguista lleva una temporada braeramente deceicionante y les cifres son reveladores, esta temporada, el Montenegrín nun ye’l mesmu de siempres
La temporada 2021/22 entamó difícil pa Uros, un entamu cuesta arriba facía paecer que la 20-21, el so meyor cursu hasta agora colos roxiblancos, nun fuere más qu’una bona racha pa elli, sicasí llogró roblar 14 tantos y dar 5 pases de gol a los sos compañeros d’equipu, siendo esti’l so meyor añu como pasador en tola so carrera. Sicasí, lo que paecía otru entamu difícil pal nueve natural de Belgrado, allargóse mientres selmanes hasta tresformase en seyes meses de capa cayida pal delanteru, que nun tenía unes cifres tan baxes dende la 2015/16, eso sí, como xugador del Palermo, onde’l so rol na plantiya nun yera nin de llueñe el que tien colos de Mareo.
El 23 del Sporting non solo baxó nes sos cifres, sinón qu’un datu bien revelador sobro lo probe del so rendimientu ye’l de los goles por tiru a puerta, la temporada pasada anotaba un de ca cuatro, y l’anterior un de ca trés. Si falamos del cursu presente, “Djucka” anota un gol por ca siete disparos al arcu.
Na 22/23 Uros Djurdjevic dispara daqué menos que nes anteriores, nes dos anteriores facíalo trés vegaes cada noventa minutos, y esti cursu 2’7, sicasí la calidá de los sos disparos cayó en picáu, yá que pasó de 1’35 a 0’9 disparos a portería por 90 minutos y ca vegada paez más claro que’l pie del xugador yá nun ye’l mesmu d’anantes.
Ye difícil pescanciar el porqué del rendimientu d’un futbolista, les sos emociones y vides privaes siempres pueden afectar a lo que vemos nel campu y gran parte del so xuegu depende de la redolada que lu arrodia cuando salta al terrén, y eses son solo dalgunes de les variables qu’afecten al so fútbol. Quiciabes seya más bono d’entender nesti casu, el Montenegrín nun tuvo mancadures nos últimos años, más allá d’una pequena mancadura de muñeca la temporada pasada, y el vestuariu paez caltener la mesma química de siempre, pero sabemos que nun fixo bien bones migues con Martí, y en concencia el so xuegu empioró na etapa Abelardo, polo que podemos entender que, quiciabes, con un modelu de xuegu que s’afaiga meyor a les sos característiques, podría averase de nuevu al Djucka qu’encandiló al Molinon colos sos goles.
Nel Dos Santos
This work is licensed under a Creative Commons Attribution 4.0 International License.
