Entrevistamos a Maxi Areñes, cabezaleru del grupu Fontoria “Ye como si mientres toi despiertu sonaren milenta melodíes na cabeza al mesmu tiempu y que na más paren al dormime”

Teo entendío que mui prósimamente tenemos nuevu discu… ¿Qué nos puedes alantrar d’él?

Sí, “GOETIA” sedrá’l cuartu trabayu de Fontoria en cinco años. La idega ye que salga al mercau el prósimu 21 de marzu, col entamu la primavera. Ye un trabayu compuestu de 7 temes, 5 d’ellos estrumentales. El tema que da nome al discu ye una pieza estrumental de pocu más de 13 menutos y nella refléxase perbién tola idega del discu. Podría decise que ye una pequeña “Pastoral”, lloñe del viaxe cuasi lixérsicu que supuso “SIRIO”, (el trabayu anterior) pero que caltién la mesma atmósfera onírica.

Musicalmente falando, nel to trabayu hai siempres una evolución hacia alantre y esti discu maxino nun seya la esceición ¿Cómo nos vas sosprender esta vez?

Lo ciertu ye que nunca hai un ·guión” trazau, ta claru que les composiciones realizaes podíen ser calificaes como “música rara” pol 80% de los oyentes. A títulu personal nun ye una cosa que me preocupe, pues nun se trató enxamás de facer música pal consumidor “standar”, si non mas bien de reflexar unos sentimientos nun momentu determinau de la vida. GOETIA ye como un cuentu enllenu maxa, ye un paseu nel cual l’oyente va alcontrar puertes que comuniquen el mundu visible con otros invisibles. Ye música mui incidental, la base perfeuta pa que’l oyente ponga les imáxenes usando el maxín. Mientres diba faciendo grabaciones, escuchaba munchísimu a compositores como Ralph Vaughan Williams, Claude Debussy o Jean Sibelius. Tamién diome por tornar a sentir discos como el “TIR NA NOG” d’Alan Stivell, o “THE ODYSSEY” de David Bedford. Toos estos compositores citaos influyéronme dende va años, pero nesti trabayu quiciabes más.

¿Qué músicos participen? ¿Tien collaboraciones?

Los músicos vienen y van, y gracies a toos esos músicos que conformaron Fontoria dalguna vez, el proyectu fue posible. Toos los integrantes, dende l’entamu hasta agora, ficieron grande esto y yo tuve la grandísima suerte de cuntar con ellos y deprender de cada ún algo. L’esencia de Fontoria ye la mestura de tolos músicos que formaron parte d’ello. Nesta ocasión “GOETIA” tamién ta enllena de collaboraciones. Pablo Canalís vuelve a dexar la so impronta, como ya ficiera en “SIRIO”. Tamién el battería Luís Arnaldo fizo un trabayu magníficu que vese reflexau nun tema que lleva por títulu “William Blake” y que ta inspirau pola obra del poeta y pintor británicu. Pa ún de los temes vocales, “SARDEA” llamose a Marco Martino, que ya hubiera puestu voz a ún de los cantares del primer discu. Marco ye piloñés y de Sardea, ¿quién meyor pa facese cargu del tema? Y llueu están 6Riales que canten y toquen nel tema “La partida”, esto yera algo que tenía perclaru. Cuando fice el tema, durante les grabaciones de “El máxicu viaxe de Fionna de Morlay”, no ví que tuviera futuru pa cuadralu naquel discu, en “SIRIO” tampocu, asina que taba predestinau a salir en “GOETIA”. Entós entamé a siguir el trabayu de les collacies de 6 Riales, resultábenme mui de verdá, humildes y con munchísimu gustu a la hora de facer los sos temes. Aceutaron la convidada y pensé “bonu, por fín voi poder sentir esti tema como sonábame na cabeza”. Yos toi mui agradecíu, reímonos munchu grabando, y pasamos munchu fríu tamién…(rises)

Sirio foi un trabayu realmente ambiciosu que tuvo una acoyida fenomenal ¿Costó ponese otra vuelta en marcha depués de sacar esi discu?

Personalmente, nun me cuesta entamar con otru proyeutu na más finalizau l’anterior, ye más, hai vegaes que ensín tar finau un discu ya toi sacando idegues pal siguiente. Una vez que el discu sal ye como si saliera de la mio mente, entós preciso enllenar esi espaciu con el siguiente proyeutu. En realidá ye algo terrible, porque pásolo mal de veres, ye como si mientres toi despiertu sonaren milenta melodíes na cabeza al mesmu tiempu y que na más paren al dormime, Teniendo en cuenta que suelo durmir una media de tres, cuatro hores, imaxínate. Un auténticu caos. Yo creo que por eso soi tan raru, la xente pensará que soi un borde terrible, que nun me relaciono, pero la realidá ye que cuéstame munchísimu desplicayos que toi metíu no más fondero del mio mundiu. Hai vegaes que conoces a xente que yos pasa daqué similar, y ye un aliviu. Y too esto acaba reflexándose nos trabayos, toos ellos son sensaciones musicaes. SIRIO fue un sucesu maraviyosu, creo que dientro de munchos años esti discu (y tola obra de Fontoria en xeneral) sorprenderá más que agora.

Nel aspeutu visual (portada, videos…) ¿Qué mos pues cuntar?

La portada ta sacada d’una semeya que fice en L’Infiestu, ye la fachada d’un edificiu que dende onde ta tomada la semeya recuérdamos a daqué parecío a un templu o similar.

Del restu encargarase Maitetxu Isla, como vién siendo habitual nos nuesos trabayos. Hai pendiente una especie de documental sobrela banda, onde va falase de munches cuestiones, dende el so orixe pasando pel procesu creativu de cada discu. Sí que facrase algo a nivel visual de cara a los conciertos.

El 10 de xunu taremos en Mieres, nel auditoriu, y vamos intentar facer un repasu a tola discografía.

¿Cómu ves l’escenariu musical asturianu anguañu? ¿Ya en xeneral el cultural?

A la primer entruga, voi retrucate lo siguiente: Veolo genial, grandísimu, variau, Fontoria nun tien cabida nel. A la segunda entruga, voi retrucate lo mesmu.

… Nun se si t’entiendo, ¿pues desplicalo meyor?

Hai músiques que nun encaxen nos circuítos creaos. Quiciabes dalgún día.

This work is licensed under a Creative Commons Attribution 4.0 International License.