El veleru histórico va poder visitase y, como novedá anguaño, va ufrir salíes costeres con una causa benéfica
Un añu más, el veleru históricu de maera Atyla, de 31 metros d’eslora y aspeutu de barcu pirata, va amarrar nos cais del Puertu Esportivu de Xixón. La embarcación ta xestionada pola Fundación Barco Atyla, una organización benéfica que promueve les soft skills, o habilidaes blandies, un conceutu que cada vez ta más de moda.
A diferencia con otros años, cuando la visita yera mui breve, esti añu’l veleru va afayase tola Selmana Santa en Xixón. Les feches previstes de la escala son del 31 de marzu al 10 d’abril. La visita cuenta cola collaboración de Visita Xixón.
Esto va permitir que la fundación puea ufrir escursiones de tres hores pela bahía de Xixón. Les escursiones van realizase del 1 al 9 d’abril n’horarios estremaos, tienen un preciu de 59 € p’adultos y 35 € pa neños y neñes y resérvense en Atyla.org/gijon. Estes escursiones son benéfiques. Un 10% de los beneficios dónense al fondu beques de la fundación Atyla, que permite que persones con falta de recursos puean esfrutar de los viaxes de desarrollu personal del barcu.
Arriendes de les escursiones, y al igual que n’años caberos, el barcu va poder visitase los díes 1, 2, 6, 7 y 8 d’abril, siempres de 11:00 a 14:00h. Pa facer la visita ye preciso apuntase con antelación na páxina Atyla.org/gijon y tien un coste simbólicu de 3,5 € p’adultos y 1,5 € pa neños y neñes (de baldre pa menores de 4 años). Estes cantidaes destínense dafechu al fondu beques mentáu.
Alberto Rodríguez
This work is licensed under a Creative Commons Attribution 4.0 International License.
