Cuando nun pasa’l tren

17 Febreru, 2023

Nun son solo cifres, tres de cada fallu, cada avería, cada retrasu, cada chapuza nos trenes de cercanies hai cientos d’hestories, de persones que vieron la so vida complicada pola inutilidá de quien mos gobierna. Nuna Asturies emprobecía comu la que vivimos un tren cancelau pue implicar arriesgar un trabayu, retrasar 3 meses una cita mélica necesaria o quedar ensin presupuestu pa comida d’esa selmana, pente munches otres posibilidaes

Garrao del facebook d’Aitana Castaño Díaz

Esta mañana cola llagaña nel güeyu, nel andén de la llínia de cercaníes C2 de Renfe, sentí: “Suprimióse’l tren de les 7.45 con destín a Uviéu. El siguiente tren va ser a les 8.45”. Y dixi, en voz alta ¡h.oder!
Corrí pa casa a coyer les llaves del coche y palante.
Repito, anantes de siguir, qu’esto que voi cuntar asocedió na llínea de cercaníes C2 de Renfe que xune L’Entregu y Uviéu. Pero güei hebio una incidencia nun túnel de Recoletos, en Madrid, entós claro, nun vais ver otra cosa nos medios de comunicación qu’esa incidencia, que yá sabéis que Madrid ye’l centru del universu mediáticu.
Sicasí, y por eso de si de sópitu, qué se yo, esto llega a dalguna persona que tien un pocu de corazón, cúntovos.
Que se suprimiera, ensin previu avisu, el tren de les 7.45 de la llínia C2 Cercaníes de Renfe que xune L’Entregu y Uviéu supunxo que Lola llorara porque tenía cita a les 9 nel HUCA ya nun llegaba. Que Manuel flipara porque nun podía faltar a la primer clas de la Universidá. Que Pilar tuviera que desconvocar una xunta. Que Saul volviere aldericar col xefe porque diba llegar tarde (y como ta la cosa de tirante, pos nun ye guay). Qu’en el so primer día de curru Josefina quedare fatal. Qu’Elvira llamare a la so fía pa dici-y que nun llegaba a buscar al so nietu pa llevalo al colexu, ergo la so fía llamó al curru pa dici-y que llegaba tarde pero qu’intentaría recuperar les hores pela tardi, colo que tuvo que llamar a la so fisio pa desconvocar cita. (SPOILER: Vien-y fatal).
Que José se quedare en La Felguera, porque nun tenía 2,70 euros de más pa pagar el billete de bus.
Qu’Ana coyera’l coche de la so tía, ensin gasolina, y tuviera qu’echar daqué al depósitu y gastar asina los postreros 10 euros de la selmana (que-y da el so güela pa que coma’l pinchu).
Que Mónica, a pesar de tener el todíu xingáu, coyera’l coche y aparcare en Los Praos, qu’hai zona blanca, pa xubir andando hasta’l centru, porque claro, nun ye plan de pagar un parking tola mañana, “Que nun lo gano”.
Qu’Antonio, que tien 82 años, esperare mientres dos hores nel andén del apiaderu’l so pueblu onde nun hai megafonía, ensin entender nada; y diéra-y una rabia terrible porque sabe que se ta faciendo mayor pero non quier ver…
Y asina, hasta non menos de 300 hestories d’andenes y apiaderos pente L’Entregu y Uviéu. Pero claru, ¿a quién-y importa eso?
A Cercaníes Renfe y a Adif paez que non.