Va cuatro díis Adrián Barbón acusaba a “otres comunidaes” de maltratar a los trabayaores sanitarios. Los trabayaores sanitarios d’Asturies salen mañana a la cai a denunciar el maltratu que carecen y piden a tola ciudadanía que participen en reclamar unos drechos que son de toos
Los principales hospitales asturianos lleven ya tiempu siendo escenariu de movilizaciones, protagonizaes sobre tou pol personal d’enfermería y llimpieza, pero nesta ocasión ta convocáu tol personal sanitariu asina comu tola población asturiana. La cita ye esti domingu a les 11:30 na estación de tren d’Uviéu, de onde’l manifestamientu partirá fasta’l SESPA.
Los sanitarios denuncien la saturación de trabayu, la falta de personal y recursos, los abusos llaborales y les desixencies de cuotes crecientes d’esfuerciu, tiempu y aguante pa trabayar nunes condiciones que de ninguna manera garanticen una atención correcha de los pacientes.
Pa que los asturianos seyan coscientes de porqué deberíen acompangalos nesta revindicación son abondos estos datos: la demora media pa una consulta ye de dos meses y mediu, la metá de los facultativos asturianos atiende a más de 1.500 pacientes, la llista d’espera pa operaciones algama los 23.744 pacientes, cuasi el 17% de los asturianos que necesitó una consulta d’Atención Primaria nun pudo acceder a ella… Les cifres nun meyoren depués del andanciu, sinón que van a pior y ya naide s’estraña d’esperar una selmana pa consiguir una cita telefónica con mélicu de cabecera.
Por tou ello, mañana a les 11:30, na estación d’Uviéu.
Redaición InfoAsturies
This work is licensed under a Creative Commons Attribution 4.0 International License.
