Bonos díes, bona xente.

Alborecemos con nubosidá rota que ye más abondosa nel estremu más oriental d’Asturies onde inclusu en zones de montaña ta nevando seliquinamente. Les temperatures tan alrodiu de los 3-4ºC pero con una sensación térmica mui baxa por mor del vientu nordés que’n puntos de la costa sopla molestu. Nel puiertu Payares rexistran -6,3ºC.

Esta selmana la entrada d’una masa d’aire mui fríu proveniente del continente va facer que los termometros se desplomen pero pola so procedencia y escasu recorríu marítimu malpenes tendremos precipitaciones.

El llunes l’aire nordés que va soplar molestu nel llitoral y zones altes va apurrinos nubosidá de retención con escasu desendolque que pue dexar precipitaciones febles, disperses ya ocasionalmente, más probables na fastera oriental y nos cordales costeros que sedrán de nieve tan solu perriba de los 200-300m. Nel surocidente van tener grandes claros y nun s’esperen precipitaciones, sicasí’l fríu tamién va ser intensu.

El martes vamos tener un día mui asemeyáu al llunes anque la cota de nieve al mediu día subirá hasta los 300-400m. Van repetise les precipitaciones febles, disperses ya ocasionales que sedrán de nuevu más probables na fastera oriental d’Asturies, tando nel surocidente con escasa nubosidá. Les temperatures camudarán poco con xelaes fonderes na cordelera y calteniéndose un ambiente fríu ya ivernal.

El miércoles ye probable que mos llegue fríu n’altor y con ello los estratos tiendan a desendolcase y dexanos precipitaciones que puen tener calter moderáu, asina y too’l fríu en capes medies tiende a amenorgar y la cota de nieve a subir, tando sobre los 200m n’alborada y acabando’l día perriba de los 500m. L’aire del nordés va tender a soplar de componente norte y la nubosidá sedrá más abondosa.

El xueves paez que escamplará pero les temperatures míninimes van desplomase con xelaes xeneralizaes en toa Asturies, siendo especialmente intenses na cordelera, faciendo que baxen con facilidá perdebaxo de los diez graos baxu ceru. Durante’l día malpenes tendremos nubes ya’l cielu va tar azul intensu, caleciendo al mediu día les temperatures por mor de la llume del sol.

El vienres seguiremos con xelaes n’alborada pero yá nun sedrán tan inteses ya estenses, amás nel cielu surdirán dellos intervalos nubosos, sobre too nel llitoral. L’aire sedrá sele ya variable y les temperatures másimes subirán un par de graos, asina y too l’ambiente seguirá ivernáu.

El sábadu va quedar el día más escampláu y les temperatures tienden a normalizase con un domingu más nuboso y yá sin xelaes.

Que paséis un bon llunes collacies ya collacios.