Bonos díes, bona xente.

Alborecemos col cielu cubiertu y unes temperatures que tan alrodiu de los 3-4ºC, rexistrándose nel puirtu Payares -5,4ºC.

Güei tendremos el cielu nuboso cola posibilidá de dalguna precipitación feble, dispersa ya ocasional, sobre too nel estremu más oriental d’Asturies ya en zones de montaña con una cota de nieve que va tar perriba de los 200m n’estes primeres hores pa subir dalgo nes hores centrales del día. Les temperatures van camudar poco calteniéndose un ambiente mui fríu y l’aire nordés pue seguir soplando molestu pela costa.

Mañana miércoles la llegada d’aire fríu n’altor xunto al role de vientu a componente norte va facer que tengamos precipitaciones pela mañana que puen tener calter moderáu y ser de nieve a los 200m con tendencia a subir la cota de nieve a partir del mediudía al amenorgar el fríu en capes medies de l’atmósfera. Les temperatures camudarán poco y l’ambiente seguirá siendo ivernáu.

El xueves paez que pue escamplar con xelaes fonderes nos valles asturianos y zones de montaña, asina y too la llume del sol malpenes mos calecerá y l’ambiente seguirá fríu inclusu al mediudía.

El vienres seguiremos col cielu poco nuboso, sicasí puen surdir dagún intervalo de nubes, sobre too pel llitoral y fastera central pero sin más importancia con unes temperatures que van seguir siendo baxes.

El sábadu tendremos una situación mui asemeyada y el domingu paez que tendremos un aumentu de la nubosidá pero esto yá lu diremos viendo.

Que paséis un bon martes collacies ya collacios.