Bonos díes, bona xente.

Lo primeru contavos que los meteollocos asturianos llevamos dende’esti sábadu pasáu con un seguimientu casi demencial de la situación que pue dase nes prósimes hores. Sabíemos que’l llunes y martes había mui poques posibilidaes de ver nevar n’Asturies en cotes mui baxes por mor del tipu de masa d’aire, mui seca en toles capes, pero esti sábadu’l modelu meteorolóxicu européu saco de la manga la posibilidá de la llegada d’una masa fría n’altor más húmeda que mos dexaría precipitaciones xeneralizaes, percontra perderíamos fríu en capes medies, como siempre too mui axustáu pa ver nevar en ciudaes como Uviéu. En los siguientes díes los demás modelos, a su manera, foron sumándose a la idega, imaxinaivos hai milenta modelos y milenta salides al día, una aunténtica llocura, too esto lo reflexamos n’un grupo de wasapp, onde participamos más de 50 llocos pol tiempu de toa Asturies. Pués bien, solo falta poco más d’una hora pa qu’entre la precipitación que ta pela mar ya entovía nun sabemos lo que va pasar con certeza pero hai munches posibilidaes de que n’estes primeres hores veamos la nieve na fastera central asturiana perriba de los 200m.

Alborecemos col cielu nuboso y unes temperatures que tan alrodiu de los 1-2ºC, rexistrándose nel puirtu Payares -6,3ºC.

Güei como falabamos anteriormente, la entra d’una masa fría n’altor va a revolver l’atmósfera provocando precipitaciones xeneralizaes que puen tener calter moderáu y ser de nieve tan solu perriba de los 200m. anque con tendencia a subir hasta los 500m a partir del mediudía. Les precipitaciones sedrán más abondoses na costa y pela mañana y l’aire va quedar sele ya variable.

Mañana xueves alboreceremos con escasa nubosidá y xelando na mayor parte d’Asturies, durante’l día pue surdir dalgún intervalu nuboso sin importancia y la llume del sol calecerá dalgo les temperatures a partir del mediudía pero asina y too l’ambiente va caltenese mui fríu.

El vienres y sábadu sedrán díes mui asemeyaos con escasa nubosidá y xelaes n’alborada que puen ser fonderes nel interior y zones de montaña ya con unes temperatures másimes que malpenes algamarán los 10ºC. El domingu paez qu’entra dalgo de nubosidá y templarán dalgo les temperatures.

Semeya de Bandoxu del nuesu collaciu Luis Alfredo.