Les asturianes siguen teniendo menor tasa d’actividá, mayor temporalidá, más tasa de trabayu parcial ya’l paru afeutayos con más fuercia qu’a los homes
Con 36.909 muyeres apuntaes a la llista del desemplegu, la tasa de paru femenín ye dos puntos superior al masculín, ya’l porcentaxe medra en función del númberu de fios: cuantos más tea una muyer, más difícil va ser que la contraten, al contrariu que pasa colos homes, qu’estadísticamente ye más probable que tengan trabayu cuantos más fios tienen. Rescampla nello la mentalidá patriarcal del empresariu contratador que da por fecho qu’una madre va tar pendiente de curiar los fios, entanto que l’home de la casa sedrá más responsable si tien “boques qu’allimentar”.
Les muyeres non solo tienen más complicao aceder al trabayu, daqué que consiguen namás el 45,39% de les muyeres que lo intenten -tasa d’actividá femenina- sinón que una bones lu tienen ye más precariu y pior pagáu. La tasa de temporalidá nel emplegu ye del 26’7%, nueve puntos superior a la masculina, y l’80% de la población ocupada a tiempu parcial son muyeres. Los emplegos tradicionalmente consideraos “femeninos” tan pior valoraos y pior pagaos que los llamaos “masculinos”, siendo ello que mientres los primeros se cientren nos curiaos y bientar de la sociedá los segundos tan mayormente dirixios a la productividá ya’l mercáu.
Redaición InfoAsturies
This work is licensed under a Creative Commons Attribution 4.0 International License.
