Ensin facer de menos a munches organizaciones que se sumen a la convocatoria cola meyor voluntá y a los miles d’asturianes y asturianos que se desplazarán a Mieres con sinceru convencimientu de tar lluchando polos drechos de les muyeres, quiero pedivos un momentu pa facer una reflexón: El manifestamientu de Mieres ta convocáu y financiáu por aquellos mesmos contra los que teóricamente se manifiesta

Opinión

Llucía F. Marqués

Un manifestamientu busca un cambeu, forciar a quien tien el poder a camudar daqué en beneficiu de los manifestantes o d’aquellos a los que los manifestantes defenden. Otra cosa, pasiase con banderes vociando deseyos al debalu ensin destinatariu concretu, llámase procesión o desfile, y ta fecho pa ser visto y presumio, ensin mayor enfotu.

Concretamente, el de güei ye un manifestamientu a favor de la muyer trabayaora, por muncho que nos caberos tiempos se intente robar a la clas obrera esti díi, diluyéndolu nun muncho más xenéricu “Díi de la muyer”. En favor de quier dicir, pa conseguir meyores pa elles;  meyores que tienen de venir dende les alministraciones públiques que les gobiernen y de les que dependen cuestiones comu les sos condiciones llaborales, la puesta en marcha de midies de creación d’emplegu, la facilitación de la conciliación familiar y la organización d’un sistema de curiaos eficiente que llibere a quienes de fechu se faen mayoritariamente cargu d’atender a dependientes, la seguridá nes cais y munches otres cuestiones. 

Por si nun se m’entiende, resumo; güei ye un díi pa pedir a los poderes públicos una implicación real que fine cola discriminación de la muyer, potenciada dende’l mesmu sistema patriarcal que representen.

Pero la mani de Mieres ta convocá, precisamente, pol executivu d’Asturies y los principales partios nel poder, responsables por aición u omisión de la situación de les muyeres n’Asturies. Ello ye, que convoquen un manifestamientu pa reclamar unes soluciones que namás ellos pueden poner en práutica. Los venti autobuses que se van averar a Mieres tan pagaos mayormente poles Cases de Conceyu y conceyalies, dalgunos incluso direutamente pola FSA ¿Contra quién se manifiesten? ¿A quién reclama soluciones el PSOE asturianu?.

Deslleir el conteníu d’esta revindicación nuna protesta xenérica contra un abstractu “enemigu machista” resta-y conteníu a la fecha y elimina toa vindicación concreta. Eso si, queda mui guapo pa que los nuesos llíderes saquen semeya xunto a la pancarta, el morao ye un color que favorez muncho.

Paralelamente, en Xixón  ta convocau otro manifestamientu que sal a les siete dende la plaza Toros a la misma hora,  entamau por Llibres y Combatives, la Plataforma SAD (Servicio de Ayuda a Domicilio) ya’l Sindicatu d’Estudiantes.  Ta nidio que me representen más.

This work is licensed under a Creative Commons Attribution 4.0 International License.