La marca ‘Gijón/Xixón’ va llucir nel kart nuevu del xoven pilotu xixonés de 9 años Nicolás Cué Lorenzo nel so primer añu na categoría Mini – Mini Nóvel

 Depués de debutar nel Campeonatu Gallegu de Karting en 2021 y acabar nos puestos primeros de los campeonatos nos que corrió en 2022, esti añu promete ser el de l’afianzamientu de Nicolás Cué Lorenzo na categoría Mini – Mini Nóvel, una categoría superior a la que-y correspuende pola so edá, namás 9 años. Y nesi camín va tener el sofitu de Visita Xixón, que robló un alcuerdu de patrociniu col xoven pilotu del equipu Squadra Racing pa llucir el llogo de la ciudá asturiana nel so kart nuevu.

Nicolás Cué Lorenzo nació en 2013. Comezó a prauticar el deporte del karting a los 5 años de forma amateur. Nel añu 2021 debutó nel Campeonatu Gallegu de Karting, onde algamó un 3er puestu na clasificación xeneral final dientro de la categoría alevín. Nel añu 2022 fízose col socampeonatu del Campeonatu Gallegu de Karting en categoría alevín, el puestu terceru de la clasificación xeneral na categoría Rookies nel Campeonatu d’Asturies y el puestu primeru nel Social 30 aniversariu Circuitu d’Asturies. Arriendes d’ello, lideró la Copa Social Circuitu d’Asturies (campeonatu de tres pruebes) na categoría alevín.

Pa la temporada 2023, en base a los buenos resultaos algamaos y la progresión confirmada y avalada por profesionales d’equipos del sector, Nicolás Cué va debutar na categoría Mini–Mini Nóvel, categoría superior a la que-y correspuende por edá, participando nel Campeonatu social d’Asturies, nes cincu prebes del Campeonatu Gallegu de Karting, nes cuatro del Campeonatu de Castilla y Llión de Karting y na preba nel Campeonatu de Valencia de Karting, que se realizará nel circuitu de Marlon Kart–Oropesa.

El karting ye la base de formación pa cualesquier disciplina de competición del mundu del automovilismu, tanto seya pa campeonatos de monoplaces (como pue ser la fórmula 1), campeonatos de montaña, rallyes, autocross, etc. Muestra d’ello ye que los pilotos que lideren campeonatos de cualesquier tipu salieron d’esta especialidá.

Alberto Rodríguez

This work is licensed under a Creative Commons Attribution 4.0 International License.