Miércoles 15 de Marzu, 2.023

@eltiempunasturies

Bonos díes, bona xente.

Alborecemos con escasa nubosidá ya con unes temperatures que tan alrodiu de los 7ºC, rexistrándose nel puirtu Payares 3,8ºC.

Güei vamos tener intervalos nubosos entemecios ente dellos claros con unes temperatures que tenderán a subir al mediudía ya col aire que yá si sedrá sele ya variable.

Mañana xueves van dir n’aumentu la nubosidá media-alta que mos dexará’l día nuble cola posibilidá de que caiga dalguna gotera a últimes hores. L’aire sedrá ábrigu y subirán moderadamente les temperatures.

El vienres alborecemos con escasa nubosidá pero van dir surdiento nubes de desendolque que pela tarde puen dexar dalgún xarabatu de calter tormentosu y dispersu que pue ser de nieve perriba de los 1600m con unes temperatures en descensu ya col aire que sedrá gallegu-baxu sele en xeneral.

El sábadu l’aire rolará a componente noroeste ya tendremos raches moderaes a fuertes en zones altes ya en puntos del llitoral con precipitaciones febles ya intermitentes, amás les temperatures siguen en descensu y la nieve pue surdir perriba de los 1400m al final del día.

El domingu va tar más seliquino con nubes ya claros y l’aire va dir amenorgando pa quedar sele ya variable con unes temperatures mínimes en descensu ya coles másimes sin grandes cambios.

Que paséis un bon miércoles collacies ya collacios.

Semeya que mos l’apurre la nuesa collacia Mary Pandiella.